ئاماژەی بەوەش کرد، ئەو یاسایە لە چوارچێوەی یاسایی وەبەرهێنانی عێراقدایە و بە گوێرەی یاساکەش نەوت و بەنزین و جۆرەکانی تری سووتەمەنی بە نرخی ٥٠٪ کەمتر لە بازاڕەکانی جیهان و ناوخۆ دەدرێت بە کارگەکان و سەرجەم کارگە بیانییەکانیش دەگرێتەوە.

باسی لەوەش کرد، ئەو کارگانەی کە تایبەتن بە وەبەرهێنانی بە نرخی پاڵپشتیکراوی ٦٠٪ سووتەمەنیان پێدەدرێت ئەم هەنگاوەش بەمەبەستی بەرزکردنەوەی ئاستی پیشەسازی ناوخۆییەوە. وتیشی، "لەگەڵ نزمبوونەوەی نرخی سووتەمەنی بە رێژەی ٥٠٪ ئەوە کاڵاکان و بەرهەمە کشتوکاڵی و ناوخۆییەکان دابەزین بەخۆیانەوە دەبینن و دەبێتە هۆی کەمبوونەوەی رێژەی هەڵاوسانی نرخی شمەک لە بازاڕەکاندا".

هاوکات، لەبارەی غازی شلیشەوە ئەوەی خستە روو، رەزامەندی دراوە لەسەر کەمکردنەوەی نرخی غازی LPG بۆ هەر تەنیک تەنها ٤١٥ هەزار دینار وەردەگیرێت و ئەوەش سەرجەم ئەو کارگانە دەگرێتەوە کە پێویستیان بە غاز هەیە بۆ وەبەرهێنان، ئەو کارگانەشی کە تایبەت بە ریسایکڵین بۆ هەر تۆنێک غازی شل تەنها ٣٣٠ هەزار دیناریان لێوەردەگیرێت.

ئەوەش لە کاتێکدایە، مەزهەر ساڵح راوێژکاری دارایی سەرۆک وەزیرانی عێراق بە دیجیتاڵ میدیای ئێن ئاڕ تی راگەیاند، خەرجییەکانی بودجەی ئەمساڵی عێراق تایبەت دەبێت بە وەبەرهینان لە کەرتی ئابووری و گەشتیاری لەسەرجەم ناوچە جیاوازەکانی عێراقدا. وتیشی، "ئەمساڵ بە تەواوی هاوکاری بازرگانان و وەبەرهێنەرانی ناوخۆیی و بیانی دەکرێت".