PM:02:30:23/01/2022
484 جار خوێندراوەتەوە
+
-
فەرمانگەها میدیا و زانیاریێن حکومەتا هەرێما کوردستانێ ڕاگەهاند، سەرۆکێ حکومەتێ دگەل وەزیرێن پێشمەرگەی و ناڤخۆ دەربارەی دەستپێکرنا لڤینێن گروپێ چەکداریێ داعش جڤیان.
ئەڤرۆ ئێکشەمبی، فەرمانگەها میدیا و زانیاریێن حکومەتا هەرێما کوردستانێ ڕاگەهاندنەک بەلاڤکر و تێدا هاتیە، مەسرور بارزانی سەرۆکێ حکومەتێ دگەل شۆرەش ئیسماعیل وەزیرێ پێشمەرگەی و وەزیرێ ناڤخۆیێ هەرێمێ رێبەر ئەحمەد جڤیا و داوی گۆهڕاکاریێن عێراق و سوریا تایبەت ب پەرەسەندنا گەفێن چەکدارێن داعش گۆتۆبێژکر.
لدویف ڕاگەهاندنێ، د جڤینێدا، سەرۆکێ حکومەتێ توندترکرن و باشترکرنا رێکارێن پاراستنا هەرێما کوردستانێ ژ گەفێن داعش دگەل وەزیرێن پێشمەرگەی و وەزیرێ ناڤخۆ گۆتۆبێژکر.
هەروەسا بەحس ل دلگرانیان دەربارەی زێدەبوونا هێرش و پەلامارێن چەکدارێن داعش ل عێراقێ و سوریا دەربڕی و تەکەزکر ژ گرنگیا بهێزکرنا هێلێن بەرەڤانیێ و توندکرنا رێکارێن پاراستنا هەرێما کوردستانێ ژ گەفێن داعش.
دیارکر ژی، پێتڤیە حکومەتا هەرێمێ دگەل حکومەتا فیدرالی و هێزێن هەفپەیمانیا ناڤدەولەت، د پەیوەندیێن بهێز و بەردەوامدابن ژ پێخەمەت بەرهنگاریبوونا گەف و مەترسیێن داعش.
ئەڤە ددەمەکیدایە، دەمێ چەند مەهانە لڤینێن چەکدارێن داعش ل سنورێ هەردوو وەلاتێن سوریێ و عێراقێ دەستپێکرینە و چەندین جاران هێرشکریە کریە سەر هێزێن ئارتێشا عێراقێ و هێزێن پێشمەرگەی و هێزێن سوریا دیموکرات ل رۆژئاڤایێ کوردستانێ و داوی هێرش سپێدەهیا دوهی بوو کو ب وی سەدەمی ١١ سەرباز هاتنە کوشتن.