AM:08:21:24/05/2024
928 جار خوێندراوەتەوە
لەگەڵ نزیکبوونەوەی وادەی کۆتایی هاتنی قۆناغی کەمکردنەوەی هەناردەی نەوت بۆ بازاڕەکانی جیهان لەلایەن وڵاتانی بەژداربوو لە رێکخراوی ئۆپیک پڵەس، نرخی نەوت بەرێژەی ٠.١٢٪ دەستی بەدابەزین کردووە و لە ئێستاشدا نرخی یەک بەرمیل نەوتی خاوی برێنت بە ٨١ دۆلار و ٣٨ سەنت مامەڵەی پێوەدەکرێت.
ئەمڕۆ هەینی، دابەزینی نرخی نەوت و نزیکبوونەوەی وادەی هەناردەکردنی نەوت بۆ بازاڕەکانی جیهان کاریگەرییەکی راستەوخۆ و گەورەی لەسەر نەوتی رۆژئاوایی تێکساس جێهێشتووە، نرخی یەک بەرمیل نەوتی تێکساس لە ٨٠ دۆلارەوە دابەزینی بەخۆیەوە بینیوە و لە ئێستاشدا بە ٧٦ دۆلار و ٨٥ سەنت مامەڵەی پێوەدەکرێت.
لەبەرامبەریشدا، چاوگێک
لە کۆمەڵەی ئۆپیک پڵەس بە ئاژانسی هەواڵی رۆیتەرزی راگەیاند، رێکخراوەکە
دەستیکردووە بە ئامادەکاری بۆ دووبارە درێژکردنەوەی وادەی کەمکردنەوەی
بەرهەمهێنانی نەوت و هەناردەکردن بۆ بازاڕەکانی جیهان، لەگەڵ ئەوەشدا ئاماژە بە
خواستی بازاڕەکانی جیهاندەدات.
ئاماژەی بەوەش کرد، هەوڵدەدەن
لەرێگای گۆڕانکارییەکانەوە و بە دیاریکردنی نرخی بەرمیلێک نەوتی وڵاتانی بەژداربوو
لە رێکخراوەکە بازارەکانی جیهان سەقامگیربکەن ، ئەوەش وادەکات نرخی نەوت سەقامگیربوون
بەخۆیەوە ببینێت.
ئەوەش لە کاتێکدایە،
رێکخراوی ئۆپیک پڵەس، لە مانگی ئازاردا بەمەبەستی سەقامگیرکردنی نرخی نەوت لە خوار ٩٠
دۆلارەوە وادەی کەمکردنەوەی هەناردەکردن و بەرهەمهێنانی نەوتی رۆژانەی وڵاتانی
ئۆپیک پڵەس و وڵاتانی خۆبەخش لە نێویشیاندا عێراقی تا مانگی حوزەیران درێژکردەوە.