سەرۆکوەزیرانی عێراق و وەزیری وزەی ئێران تاوتوێی هەماهەنگییەکانی نێوان هەردوو وڵاتیان لەبارەی پشکی ئاو و کارەبایان کرد.
نوسینگەی سەرۆکوەزیرانی عێراق راگەیەنراوێکی بڵاوکردەوە و تیایدا هاتووە، محەمەد شیاع سودانی سەرۆکوەزیران لە بەغدا پێشوازیی لە عەلی ئەکبەر میحرابیان وەزیری وزەی ئێران و شاندی یاوەری کرد.
لە راگەیەندراوەکەدا ئاماژە بەوەشدراوە، لە دیدارەکەدا تاوتوێی بوارەکانی
هاوکاری هاوبەش و چۆنییەتی پتەوکردنی ئاڵوگۆڕ و هەماهەنگی لەبارەی ئەو ئاڵنگارییانەی
کە لەسەر ئاستی هەرێمی و نێودەوڵەتی رووبەڕووی کەرتی وزە دەبنەوە کران.
هەروەها، باس لە دۆسیەی کارەبا و بەستنەوەی کارەبا لە ئێرانەوە بەتۆڕی
کارەبای نیشتمانی عێراق کرا.
هاوکات، کەمئاوی و کاریگەریەکانی
وشکەساڵی و پشکی ئاو لە رێڕەوی رووبارە هاوبەشەکان یەکێکی دیکە بووە لەو دۆسییانەی
سودانی و میحرابیان گفتوگۆیان لەبارەوە کردووە.
هەر بەگوێرەی راگەیانراوەکەی نوسینگەی سەرۆکوەزیرانی عێراق، محەمەد شیاع
سودانی جەختی لە گرنگی بەردەوامی گفتوگۆ و
هەماهەنگی و سوود وەرگرتن لە ئارامی سیاسی لە ناوچەکەدا کردەوە لەپێناو دەستەبەرکردنی
سوود و خواستی هەموو گەلانی دۆست و برا.
ئەمە لەکاتێکدایە، دوێنێ عەلی ئەکبەر میحرابیان بەسەردانێکی فەرمی بە
مەبەستی بەشداریکردن لە کۆنگرەی سێیەمی بەغدا بۆ پرسی ئاو گەیشتە فرۆکەخانەی نەجەفی نێودەوڵەتی.