ئاماژەی بەوەشدا، لەمڕۆوە تاوەکو رۆژی یەکشەممە هاوڵاتییانی تورکیا لە هەرێم دەتوانن لە کونسوڵخانەی تورکیا لە هەولێر بەشداری لە پرۆسەی هەڵبژاردن بکەن و دەنگبدەن.

ئەوەشی خستەڕوو، ئەمڕۆ یەکەم رۆژی پرۆسەی هەڵبژاردنی تورکیا بوو و بە سەرکەوتوویی و بەبێ بوونی هیچ کێشەیەک بەڕێوەچوو و بانگهێشتی هاوڵاتیانیان دەکەن بۆ بەشداریکردن، چونکە دەنگدان پرۆسەیەکی دیموکراسییە.

مەولود یاقوت وتیشی، "سێ هەزار و ٨٤٣ کەس لە هەرێم مافی دەنگدانیان هەیە لە کونسوڵخانەی تورکیا."

لەبارەی شێوازی هەڵبژاردنەوە باسی لەوەکرد، پرۆسەی دەنگدان و هەڵبژاردنی سەرۆکایەتی و پەرلەمانی تورکیا لە رێگەی دوو فۆرمی جیاوازەوە دەکرێت و دواتر هەڵدەگیرێت و رەوانەی تورکیا دەکرێتەوە بۆ ژماردنی دەنگەکان.

ئەوەشی ئاشکرا کرد، لە کاتژمێر ٩ی شەوی رێکەوتی ٧ی ئایار کۆتا وادەی بەشداریکردن دەبێت لە هەڵبژاردنەکانی تورکیا لە کونسوڵخانە، بەڵام لە دەروازەی ئیبراهیم خەلیل پرۆسەکە تاوەکو رێکەوتی ٩ی ئایار بەردەوام دەبێت.

ئەمەش لە کاتێکدایە، بڕیارە لە لە ١٤ی ٥ی ٢٠٢٣ هەڵبژاردنی سەرۆکایەتی تورکیا بەڕێوەبچێت و هەریەک لە رەجەب تەیب ئەردۆغان سەرۆکی ئێستای تورکیا و سەرۆکی ئاک پارتی و کەمال کلیچدار ئۆغڵو سەرۆکی جەهەپە دوو کاندیدی رکابەری یەکترن.

لەم هەڵبژاردنەدا سێ ملیۆن و ٤٠٠ هەزار دەنگدەر لە دەرەوەی تورکیادا مافی دەنگدانیان هەیە و پێنج ملیۆن و ٢٠٠ هەزار دەنگدەری دیکەش یەکەمجارە دەنگ دەدەن. بۆ ئەم هەڵبژاردنە پێنج هاوپەیمانی پێکهێنراون و هەر پارتێکیش بتوانێت بەربەستی ٧٪ تێپەڕێنێت دەتوانێت بچێتە پەرلەمانەوە.