AM:10:33:02/05/2024
40 جار خوێندراوەتەوە
+
-
حەفتیەک دەربازبوو بسەر بڕیارا حکومەتا رێڤەبرنا کاران بۆ رادەستکرنا
داهاتێ ناڤخۆ، لێ تا نها چ کوژمەکێ پارەی نەخستیە سەر هژمارا بەنکیا بەغدا، ئەڤەژی
ئێکە ژ سەدەمێن نەهنارتنا مووچەی و لدیف دەستور و بڕیارا دادگەها فیدرالی، دڤێت
هەرێم داهاتێ ناڤخۆ رادەستی بەغدا بکەت، لێ ٢١ سالن پارتی و یەکێتی ئێک دینار
رادەستی عێراقێ نەکرینە.
لسەر بنەمایا نڤیسارا وەزارەتا داراییا هەرێمێ کو بۆ بەغدا هنارتیە و
تێدا ئاماژە ب وی یەکێ هاتیەکرن، داهاتێ ناڤخۆیێ هەرێمێ ٤٤٧ ملیار دینارن، بەغدا
ژی داخازا هنارتنا ٩٠٥ ملیار دیناران ژ هەرێمی کریە وەک داهاتێ ناڤخۆیێ هەردوو
مەهێن ئێک و دوو یێن دەستپێکا ئەڤسالە، لێ هەرێمێ تا نها رادەست نەکریە.
ئێن ئار تی زانیە، هەرێم ژ بلی کو بەرهەڤ نینە داهاتێ ناڤخۆ رادەست
بکەت، بزاڤان دکەت کو وێ ژمارەیێ کێم بکەت کو داهاتێ ناڤخۆ ٤٤٧ ملیار دینارن و گوتیە
بەغدا ئەو ژمارەیە ب شاشی هاتیە نڤیسین، د دەمەکی دا پارتی ویەکێتی زێدەباری
داهاتێ ناڤخۆ مەهانە ٢٥ ملیار دیناران ژی ژ هەڤپەیمانان وەردگرن بۆ مووچەیێ پێشمەرگەی
و بەردەوامن ژ فرۆتنا پەترۆلا ب قاچاغ، ب ڤێ یەکێ ژی مەهانە داهاتێ ناڤخۆ ب زێدەتری
٨٢٠ ملیار دیناران دهێتە خەملاندن.
لدیف ئاخفتنا حکومەتا رێڤەبرنا کاران، داهاتێ ناڤخۆ یێ چار مەهێن دەستپێکا
ئەڤسالە یێ هەرێمێ ترلیۆنەک و ٧٨٨ ملیار دینارن، ئەگەر پەترۆلا ب قاچاغ ژی بچیتە
سەر، ئەڤە داهاتێ هەڕێمێ د ڤان چار مەهان دا دکەتە سێ ترلیۆن و ١٨٨ ملیار دینار،
ئانکو ب ساناهی دا شێت سێ مووجەیێن داویا سالا دەربازبووی دابەش بکەت، ب وێ یەکێ
کو هەرێمێ مەهانە پێدڤی ب ٩٥٠ ملیار دیناران هەیە بۆ دابەشکرنا مووچەیێ ئێک مەهـ و
بۆ هەر سێ مەهان پێدڤی ب دوو ترلیۆن و ٨٥٠ ملیار دیناران دبیت، کو هێشتا ژی ٣٣٨
ملیار دینار زێدە دمینن.
کەواتە حکومەتا رێڤەبرنا کاران نە داهاتی رادەستی بەغدا دکەت نە ب خۆ
ژی بۆ مووچەی خەرج دکەت، نە یا بەرهەڤە ژی ب رێکا چاکسازیێ ئاریشەیا داهاتێ ناڤخۆ
ئێکئالی بکەت و ب ئاوایەکێ دادپەروەرانە بێخیتە خزمەتا پرۆژە و خزمەتگوزاریێن
ناڤخۆیی.