سەردێڕ:

وەزارەتی کۆچ ژمارەی ئەو منداڵە عێراقییانەی ئاشکراکرد کە لە کەمپی هۆلدا ماونەتەوە

AM:08:30:22/03/2022

3344 جار خوێندراوەتەوە

وەزارەتی کۆچ و کۆچبەرانی عێراق رایگەیاند، تا ئێستا ٢٠ هەزار منداڵی ئاوارەی عێراقی لەناو کەمپی هۆلدا ماونەتەوە. دەشڵێت، "ئەمەش هەڵەیەکی گەورەیە و پێویستە بگەڕێنرێنەوە بۆ عێراق تا لەلایەن داعشەوە بەکار نەهێنرێن".


کەریم نوری بریکاری وەزارەتی کۆچ و کۆچبەرانی عێراق لە چوارچێوەی دیدارێکیدا لەکەناڵی فەرمی عێراق ئاشکرای کرد، هێشتا ٢٠ هەزار منداڵی ئاوارەی عێراقی لە کەمپی هۆلدا دەژین.

ئاماژەی بەوەشدا، ئەمەش مەترسییەکی گەورەیە، چونکە دەکرێت لەلایەن ئەو خێزان و ئاوارە داعشییانەی لەناو کەمپەکەدا دەژین بەکار بهێنرێن و پەروەردەبکرێن و ئەمەش هەڵەیەکی گەورەیە.

کەریم نوری باسی لەوەشکرد، کۆی ژمارەی ئەو ئاوارە عێراقییانەی لە کەمپی هولدا دەژین ٣٠ هەزار ئاوارەن، ٤٥٣ خێزان لەوانەی هیچ ئاماژەیەکیان لەسەر نییە گەرێنراوەنتەوە بۆ عێراق و لە کەمپی جەدعە لە پارێزگای نەینەوا جێگیرکراون.

وتیشی، دوێنێ ٢٤ خێزانی دیکەی عێراقی کەلە کەمپی هۆلدابوون گەڕێنراونەتەوە بۆ پارێزگای ئەنبار و پێشتریش ٧٤ خێزانی دیکە گەڕێنراونەتەوە.

کەمپی هول لەناو خاکی سوریا لە ساڵی ١٩٩١ەوە و لە دووری ١٣ کیلۆمەتر لە سنوری عێراقەوە دروستکراوە و لە ئێستادا نزیکەی ٧٠ هەزار کەس تیایدا دەژین کە بەشێکیان لە خێزان و ئەندامانی گروپی چەکداری داعشن.













گەلەری