بەگوێرەی زانیارییەکانی پەیامنێری ئێن ئاڕ تی، تەرمی کۆچبەرێک لە سنوورەکانی نێوان بیلاڕوسیا و لیتوانیا لە کیسەخەوێکدا دۆزراوەتەوە.
ئەمرۆ یەکشەممە، هەڵگورد عومەر پەیامنێری ئێن ئار تی ئاماژەی بەوەدا، لە سنورەکانی نێوان هەردوو وڵاتی بیلاڕوسیا و لیتوانیا لە کیسەخەوێکدا تەرمی کۆچبەرێک دۆزراوەتەوە، دەشڵێت، بەهۆی ئەوەی پاسپۆرت و ناسنامە و هیچ دۆکیۆمێنتێکی پێننیە نازانرێت خەڵکی کوێیە.
دوێنێ شەممە، ئاژنسی ھەواڵی بیلاڕوسیا بڵاویکردەوە، خۆبەخشەکان
لە وڵاتەکەیاندا ھەوڵدەدەن بارودۆخی سەختی کۆچبەران ئاسان بکەن بە دابینکردنی خۆراک
و جلوبەرگ و بەتانی، چونکە کەش و ھەوا و بەفربارین سەختی و نەھامەتییەکانی ژیانی کۆچبەرانی
سنووری بیلاڕوسیا و پۆڵەندای زیادکردووە و کۆچبەران تا ئێستا لە کامپەکانی سنوری بیلاڕوسیادا
رۆژەکانیان بەسەردەبەن.
لە ماوەی رابردوودا، بەهۆی نەبوونی خواردنی پێویست و شوێنی
مانەوەیان و سەختی گوزەرانیان لەژێر خێمە و نزمبوونەوەی پلەکانی گەرما بۆ ژێر سفر
لە جەنگەڵەکانی نێوان بیلاروسیا و پۆڵەندا و لیتوانیا ژمارەیەک کۆچبەری کورد گیانیان
لەدەستدا.
ئەمە لەکاتێکدایە، قەیرانی کۆچبەران ماوەی زیاتر لە مانگێکە
دروست بووە لەسەر سوری نێوان بیلاڕوسیا و پۆڵەندا، دەسەڵاتدارانی یەکێتی ئەوروپا
رایانگەیاندووە بە ھەموو شێوەیەک دژی وەرگرتنی کۆچبەرانن بۆ ناو خاکەکەیان.
ھاوکات، لەناو کۆچبەراندا خەڵکی ھەرێمی کوردستان و عێراق
بوونیان ھەیە و بەشێک لە کۆچبەران تا ئێستا نەگەڕاونەتەوە و لە سنورەکان ماونەتەوە
و تا ئێستاش بەشێکیان بە چوار کاروان کە ھەزار و ٤٥٨ کۆچبەرە لەرێگەی فرۆکەخانەی ھەولێر
و بەغداوە گەڕاونەتەوە.
