وتیشی "هێزە ئەمنییەکان لێپرسینەوەیان لە خەڵکی کردووە لە کاتی داخستنی بازاڕدا بەمەبەستی ئەوەی بزانن خۆپیشاندەرن یاخود کاسبکار".

هاوکات لە خۆپیشاندانەکەى سەرلەئێوارەى ئەمڕۆى سەراى سلێمانیدا خوێندکارێک بەفیشەک بریندار بوو و بۆ چارەسەرکردن گەیەنرایە نەخۆشخانە.

پەیامنێری ئێن ئاڕ تی رایگەیاند، خوێندکارە بریندارەکە تەمەنى ٢١ساڵە و فیشەک بەر قاچى کەوتووە و بۆ چارەسەرکردن گەیەندراوەتە نەخۆشخانە و بارى تەندروستى جیگیرە".

هەروەها زوهرە عەلی پەیامنێری ئێن ئاڕ تی لەبارەی خۆپیشاندانەکانی پیرەمەگرونەوە باسی لەوە کرد "خەڵکی پیرەمەگرون داوای خزمەتگوزاری و دابینکردنی پێداویستی و مافەکانیان دەکەن، خۆپیشاندانەکان لە پیرەمەگرون گرژی بەخۆیەوە بینیوە".

وتیشى "خۆپیشاندەران فەرمانگەکانى ناحیە، کارتى نیشتمانی، هاتوچۆ و کتێبخانەیان لە پیرەمەگرون سووتان".

دوابەدوای ئەوەی چوار رۆژە خوێندکاران رژاونەتە سەر شەقامەکان و داوای دەرماڵە دەکەن، هاوشێوەی ئەوان ئەمڕۆ لە بەشێک لە شار و شارۆچکەکانی هەرێمی کوردستان (سلێمانی، سەیدسادق، رانیە، پیرەمەگرون) هاوڵاتییان بەهۆی کەمی خزمەتگوزارییەوە رژانە سەر شەقامەکان.

یەکیک لە خۆپیشاندەران باسی لەوەکردوە گرفتی نەبوونی نەوت و غازییان هەیە لە کاتێکدا وەرزی سەرما دەستی پێکردووە و حکومەت بێباکە لە دابینکردنی خزمەتگوزارییە سەرەتاییەکان بۆیان.

پەیامنێری ئێن ئاڕتی لە شاری سلێمانیش باسی لەوەکرد، لە شاری سلیمانی خۆپیشاندانی هاوڵاتییان دەستی پێکردووە لە سەرای سلێمانی و خۆپیشاندەران داوای خزمەتگوزاری و چاکسازییان دەکرد بەڵام هێزە ئەمنییەکان بە گازی فرمێسکرێژ و تەقەکردن روبەروی خۆپیشاندەران بونەتەوە.

بە گوێرەی وتەی پەیامنێری ئێن ئاڕ تی لە شاری دهۆک، گرفتی کەمی غاز دروستبووە لە شاری دهۆک و خەڵکی سەرەیان گرتووە بۆ وەرگرتنی غاز و ئەمەش گرفتی بۆ ماڵان و خواردنگەکان دروستکردووە.