سەردێڕ:

وەزارەتی تەندروستی وادەی جێبەجێکردنی بیمەی تەندروستی ئاشکرا کرد

PM:03:34:24/04/2022

4548 جار خوێندراوەتەوە

وەزیری تەندروستی عێراق رایگه‌یاند، یاسای بیمەی تەندروستی لە مانگی ئابی ئه‌مساڵدا دەستپێبکات، بەڵام جێبەجێکردنی پشت دەبەستێت پەسەندکردنی بودجەوە، دەشڵێت، " سەرەتا لە سێ پارێزگادا جێبەجێدەکرێت".


هانی ئەلعەقابی، وەزیری تەندروستی عێراق بە ئاژانسی فەرمی هەواڵی عێراقی راگەیاند، دەستەی کارگێڕی بیمەی تەندروستی لە هەموو پارێزگاکانی عێراق پێکهێنراوە و کادرەکانیان ناساندوە کە کاریان لەسەر خولەکانی دەرەوە و ناوەوەی وڵات کردوە و ئەزمونیان لەو باریەوە پەیداکردووە.

ئەوەشی خستەڕوو، بە گوێرەی یاسا دەبێت لە مانگی ئابی ئەمساڵدا داواکارییەکە دەستپێبکات، بەڵام بە بودجەی گشتیەوە بەستراوەتەوە و ئەگەر پەسەند نەکرێت ناتوانرێت بخرێتە بواری جێبەجێکردنەوە.

هانی ئەلعەقابی ئاماژەی بەوەشدا، پەسەندکردنی یاسای بودجە رێگە خۆش دەکات بۆ جێبەجێکردنی بیمەی تەندروستی لە سێ پارێزگا وەک قۆناغی یەکەم و دواتر وردە وردە سەرجەم پارێزگاکان دەگرێتەوە.

وتیشی، دەستنیشانکردنی ئەو پارێزگایانەی کە دیاریکراون بەپێی ژێرخانی پارێزگاکە و ژمارەی نەخۆشخانە و ژمارەی دانیشتوانیان بووە.

ئەمە لەکاتێکدایە، به‌پێی یاسای بیمه‌ی ته‌ندروستی، بەشی زۆری تێچوەکانی چارەسەر لە نەخۆشخانە حکومییەکان و ئەهلییەکان بۆ نه‌خۆش دابین دەکرێت، كه‌ ئامانجی پڕۆژەکە کەمکردنەوەی خەرجی و تێچونی زۆری چارەسەرەکان و خزمەتگوزارییە تەندروستییەکانە.

پێشتر عەقابی لەمیانەی کۆنفرانسێکی رۆژنامەنوسیدا لە ئەنجومەنی نوێنەران ئاشکرای کرد، یاسای بیمەی تەندروستی بە سێ قۆناغ جێبەجێدەکرێت. لە قۆناغی یەکەمدا تۆمارکردنی هاوڵاتیان و فەرمانبەرانەلە بیمەی تەندروستی دەبێت، پاشان لە قۆناغی دوەمدا هەمو هاوڵاتییان بە خۆبەخشی تۆمار دەکرێن و چەند مانگێک دواتر یاساکە دەچێتە بواری جێبەجێکردنەوە، لە قۆناغی سێیەمدا سەرجەم هاوڵاتییان تۆمار دەکرێن.













گەلەری