PM:02:49:06/05/2024
80 جار خوێندراوەتەوە
+
-
ئەڤڕۆ دووشەمبی، ئومێد
خۆشناو پارێزگارێ هەولێرێ دەربارێ سوتنا بازارێ قەیسەریێ راگەهاندەک بەلاڤکر و
راگەهاند، شەڤا دەربازبووی ئاگرەکێ مەزن بەربوو بازارێ قەیسەریێ، لی پشتی بزاڤێن
بەردوام یێن تیمێن بەرەڤانیا باژێڕی ئاگر هاتە کۆنترۆلکرن.
ئەو یەکژی بەرچاڤکر، د
بوویەرا شەڤا دەربازبووی دا ژ سەرجەمێ (٤٠٠٠) دوکانان، (٢٢٧) دوکان و (٧) کۆگەهێن
بچیک هاتینە سوتن و هژمارەکێ ژی زیان پێکەفتینە.
ئاماژە ب وێیەکێ ژیکر، د
ڤێ بوویەرا ئاگر بەربوونێ دا ژبلی زیانێن ماددی زیانێن ژیان ژدەستدانێ نەبوون، گوت
ژی، "١٣٢ کەس ژ ئەفسەر و کارمەندێن بەڕەڤانیا باژێڕی و ئاسایش و پۆلیس و
کاسبکار و وەلاتی، ژبەر دویکێلا ئاگری ساخلەمیا وان تێکچوویە و هەر زوو ژ لایێ
تیمێن ساخلەمیێ ل جهێ بوویەر چارەسەری بۆ ١١٧ کەسان هاتینە کرن و ١٥ کەسێن دی هاتنە
ڤەگوهاستن بۆ نەخۆشخانەیێ و چارەسەریا پێدڤی بۆ هاتینە ئەنجام دان".
ئەو یەکژی راگەهاند،
لژنەیەکا ڤەکۆلینی و دیڤچوونێ بۆ سەدەمێ ئاگر بەربوونێ و خەملاندنا قەبارەیێ
زیانێن ماددی پێکئینایە و ب ڤان نێزیکان دێ ئەنجامێن ڤەکۆلینێ ئەشکرا کەین.
ئەڤە د دەمەکی دایە، شەڤا ٥ـی ئەیارێ ئاگر بەربوو بازارێ قەیسەری ل هەولێرێ و پشتی چار دەمژمێران ئاگر ژ لایێ چەندین تیمێن بەڕەڤانیا باژێڕی هاتە کۆنترۆلکرن.
هەڤدەم، بۆ جارێ دووێ یە ل سالا ٢٠١٨ـێ ڤە، ئاگرەکێ مەزن بەربیتە بازارێ قەیسەری ل هەولێرێ و د ئەڤسالەدا چارەم بوویەرا ئاگر بەربوونێ یە ل بازارێن هەولێرێ.
٢٧ـی شوباتا ئەڤسالە، ئاگر بەربوویە بازارێ لەنگەی ل هەولێرێ، وی دەمی پارێزگارێ هەولێرێ راگەهاند، ١٦٦ دوکان ب تەمامی هاتینە سوتن و ٩٠ کەس ژبەر ئاگری ساخلەمیان وان تێک چوویە و ٢٤ کەس هاتینە ڤەگوهاستن بۆ نەخۆشخانەیێ.
دیڤدا و ل ٨ـی نیسانا ئەڤسالە، دووبارە ئاگر بەربوو بازارێ لەنگەی ل هەولێرێ و ٥٠ دوکان سوتن و ئەڤەژی سێیەم بوویەرا ئاگر بەربوونێ بوو ل وێ بازارێ ل سالا ٢٠١٨ـێ ڤە.
ل ٢٣ـی نیسانا ئەڤسالە، ئاگر بەربوو بازارێ شێخەللا ل هەولێرێ و ژبەر هندێ زیان بەر هژمارەکا دوکانان کەفت.
هەڤدەم، د هەمی بوویەرێن ئاگر بەربوونا د ئەڤسالەدا، زیانەکا زۆر بەر دوکان دار و کاسبکاران کەفتینە، تا نها چ کەسەک ژلایێ حکومەتا رێڤەبرنا کاران نەهاتییە قەرەبووکرن کو ژبەر ئاگری زیان پێکەفتییە و زۆربوونا هژمارا بوویەرێن ئاگر بەربوونێ گومان ژ لایێ وەلاتی و کاسبکاران دروستکرینە.