PM:01:33:03/05/2024
1040 جار خوێندراوەتەوە
+
-
پشتی گڤاشتنێن نەوەی نوێ
و رژدیا حکومەتا عێراقێ بۆ ب بەنک کرنا مووچەیێ مووچەخۆرێن هەرێمێ ب رێکا بەنکا
بازرگانیا عێراقێ، پرۆژەیێ هژمارا من یێ مەسرور بارزانی نێزیک بوویە ژ هەلوەشاندنێ
و لدیف نڤیسارەکێ حکومەتا رێڤەبرنا کاران رازی بوویە ب ڤەکرنا هژمارێن بەنکی ل
بەنکا تی بی ئای.
هزرا هژمارا من ئەو بوو
مووچەخۆر بتنێ ل وان پێنج بەنکان هژمارا بەنکی ڤەکەن کو پارتی و یەکێتی دیار کرینە
هەیا مووچەخۆر ل بن دەستێ وان دا بن.
هەڤدەم، ب ڤێ پێنگاڤا
کرداری هژمارا من هاتە هەلوەشاندن، ژبەر کو فەرمانبەر و مووچەخۆر ئازادن کو ل
بەنکێن حکومی یێن عێراقێ هژمارا بەنکی ڤەکەن کو زێدەتری 6 مەهانە نەوەی نوێ داخاز
دکەت و 119 ئیمزایێن پەرلەمانتاران بۆ کۆمکرن.
دەستپێکێ دەستهەلاتدارێن
پارتی و یەکێتی د گوتن ئەڤە خیانەتە و نەمانا قەوارەیا هەرێمێ یە، لێ نها و پشتی
گڤاشتنێن بەغدا، ب نەچاری رازی بوون ب داخازا وان 119 پەرلەمانتاران کو نەوەی نوێ
ئیمزا کۆمکربوون و سەرۆکێ ڤەلڤینا نەوەی نوێ گەهاندنە سەرۆک وەزیرێن عێراقێ.
ژ لایەکێ دی ڤە، ئەڤرۆ ئەینی،
بەنکا بازرگانیا عێراقێ د نڤیسارەکێ دا داخاز ژ وەزارەتا داراییا حکومەتا رێڤەبرنا
کارێن هەرێمێ کریە بەرهەڤیان بکەت بۆ بەنک کرنا مووچەیێ مووچەخۆرێن هەرێمێ و بۆ وێ
مەرەمێ ژی ئاسانکاری بۆ دەست گەهشتن ب لیستا مووچەیێ مووچەخۆران بهێنە کرن.
بەحسا وێ یەکێ ژی
کر، داخاز ژ وەزارەتا داراییا حکومەتا رێڤەبرنا کارێن هەرێمێ دکەین هەمی وەزارەت و
رێڤەبەریان هایدار بکەت کو ژ رۆژا ئێکشەمبی ڤە ب رێکا بەنکا بازرگانیا عێراقێ TBI دشین دەست ب بەنک کرنا مووچەیێن خۆ بکەن.
ئەڤە د دەمەکی
دایە، رۆژا 3ـێ تشرینا ئێکەما سالا دەربازبووی فراکسیۆنا نەوەی نوێ ل پەرلەمانێ عێراقێ
پرۆژەیەک پێشکەشکرن بۆ دابەشکرنا مووچەیێ فەرمانبەرێن هەرێمێ ب رێکا بەنکا بازرگانیا
عێراقێ و چەند پەرلەمانتارێن فراکسیۆنێن جودایێن پەرلەمانێ عێڕاقێ ئیمزا لسەر وی
پرۆژەی کرن کو 119 ئیمزا بوون.
پشترا، شاسوار حەبدولواحید
سەرۆکێ ڤەلڤینا نەوەی نوێ ئەو پرۆژەیە گەهاندە محەمەد شیاع سودانی سەرۆک وەزیرێن عێراقێ
و ئەو پرۆژەیە ژی پەسەند کر.