PM:01:49:02/05/2024
348 جار خوێندراوەتەوە
+
-
سەرۆکا فراکسیۆنا نەوەی نوێ ل پەرلەمانێ عێراقێ بۆ ئێن ئاڕ تی ڕاگەهاند،
دگەل نوینەرێ وانەبێژان سەرەدانا وەزیرا داراییا عێراقێ کریە و ب وان گۆتیە،
ئاریشەیا وانەبێژان ژ لایێ هەرێمێ ڤە یە. دبێژیت ژی، "مە سۆز ژ وەزیرا داراییا عێراقێ وەرگرت بۆ دامەزراندنا
وانەبێژان".
ئەڤرۆ پێنجشەمبیێ، سروە عەبدولواحید سەرۆکا فراکسیۆنا نەوەی نوێ ل پەرلەمانێ
عێراقێ بۆ ئێن ئاڕ تی ڕاگەهاند، هەر چ یا ژ دەستێ وان دهێت بۆ خزمەتا خەلکێ خەم
ساریێ ناکەن و نوینەرێن مامۆستایێن وانەبێژ داخاز کریە تەیف سامی وەزیرا داراییا
عێراقێ ببینن و ئەڤرۆ دگەل وەزیرا دارایی کۆمبووینە.
ئاماژە ب وێ یەکێ ژی کر، تەیف سامی وەزیرا داراییا عێراقێ گۆتیە وان
ئاریشەیا مامۆستایێن وانەبێژ ل هەرێمێ یە و حکومەتا رێڤەبرنا کاران لیستا مووچەیێ
وانەبێژان نە هنارتیە بۆ حکومەتا فیدرال. دبێژیت ژی، "حکومەتا رێڤەبرنا کاران
ب تنێ سۆزان ددەت و جێبەجێ ناکەت".
ئەویەک ژی بەرچاڤ کر، دوو رێک هەنە بۆ چارەسەرکرنا ئاریشەیا وانەبێژان
ئێکەم ئەوە جهێ وانەبێژان د وی خشتەی دا ڤەکەن کو وەزارەتا دارایی بۆ پەرلەمانێ
عێراقێ دهنێریت و ئیمزایان کۆمبکەن بۆ دامەزراندنا وان، دووەم رێک، بزاڤ بۆ
مامۆستایێن وانەبێژ بهێنە کرن ژ لایێ هەرێمێ ڤە بهێنە دامەزراندن.
دبێژیت ژی، "بزاڤان دکەن د ئەڤسالە دا ئاریشەیا وانەبێژان چارەسەر
بکەن و بهێنە دامەزراندن".