PM:09:28:14/09/2026
864 جار خوێندراوەتەوە
بەڕێوەبەرایەتیی هاتووچۆی هەولێر جەخت لە قەدەغەکردنی راگرتنی ئۆتۆمبێل شەوانە و رۆژێک پێشتر لە نۆرەی بەنزینخانەکاندا دەکاتەوە و هۆشداری دەداتە شۆفێران لە راگرتنی ئۆتۆمبێلەکانیان لە دەوروبەری بەنزینخانە و کۆڵانەکاندا.
ئەمڕۆ دووشەممە ١٤ـی ئەیلوولی ٢٠٢٦، بەڕێوەبەرایەتیی هاتووچۆی هەولێر راگەیەندراوێکی فەرمیی بڵاوکردەوە و تێیدا ئاماژەی بەوە کردووە، بەهۆی پابەندنەبوونی بەشێک لە شۆفێران بە بڕیارەکەی بەڕێوەبەرایەتیی نەوت و کانزاکانی هەولێر لە (٣٠ـی ئابی ٢٠٢٦)، بڕیاریانداوە بە قەدەغەکردنی بەجێهێشتنی ئۆتۆمبێل لە شەواندا، بە مەبەستی رێگریکردن لە دروستبوونی قەرەباڵغی و ئاستەنگی هاتووچۆ و بێزارکردنی هاووڵاتییان لە گەڕەک و کۆڵانەکاندا.
لە راگەیەندراوەکەدا
هاتووە، سەرەڕای دەرچوونی بڕیارەکە، بەشێک لە شۆفێران پابەندی رێنماییەکان نەبوون
و شەوانە ئۆتۆمبێلەکانیان بۆ نۆرەی بەنزین بەجێهێشتووە، بۆیە بە مەبەستی رێکخستنی
هاتووچۆ و رێگریکردن لە دروستبوونی قەرەباڵغی لە شەقامەکانی دەوروبەری بەنزینخانەکان
و بەردەم دووکان و شوێنە گشتییەکان، بڕیاردرا بە قەدەغەکردنی بەکۆمەڵی راگرتنی ئۆتۆمبێل
لە نۆرەی بەنزیندا بە شەو و رۆژێک پێشتر، بەتایبەت کاتێک ئەم ئۆتۆمبێلانە ببنە هۆی
دروستکردنی ئاستەنگ و بێزارکردنی هاووڵاتییان لە ناو کۆڵان و گەڕەکەکاندا.
لە
کۆتاییدا داوای لە سەرجەم شۆفێران کردووە، بە تەواوی پابەندی ئەم رێنماییانەبن و شەوانە
ئۆتۆمبێلەکانیان لە شەقام و کۆڵانەکانی دەوروبەری بەنزینخانەکان بەجێنەهێڵن، بەپێچەوانەوە
رووبەڕووی لێپرسینەوەی یاسایی دەبنەوە.
