لە راگەیەندراوەکەی دەم پارتیدا هاتووە، هاوکات عەبدوڵڵا ئۆجەلان داوای چالاککردنی لیژنەکانی ئاشتی، جێبەجێکردنی بەرپرسیارێتیی یاسایی دوای دەرچوونی یاسای چوارچێوە و قۆستنەوەی ئەم دەرفەتە مێژووییەی لە تورکیا رەخساوە کردووە، هۆشداریشی داوە لە هاوکێشە هەستیارەکانی ناوچەکە و هەوڵە تێکدەرانەکان، بە پێویستیشی زانیوە گفتوگۆکان بەردەوام بن تاوەکو رێگری لە ئاڵۆزی لە رۆژئاوای کوردستاندا بکرێت.

لە بەشێکی دیکەی ڕاگەیەندراوەکەدا ئاماژە بەوە کراوە، ئۆجەلان داوای چالاککردنی راستەوخۆی ئەو ئەنجومەن و لیژنانەی کردووە کە بە تایبەت بۆ بەڕێوەبردنی پڕۆسەکە پێکهێنراون.

جەختیشی لەوە کردەوە، دوای دەرچوونی یاسای چوارچێوە، پێویستە هەموو لایەنە پەیوەندیدارەکان بەرپرسیارێتیی تەواوی خۆیان لە پڕۆسەکەدا جێبەجێ بکەن و ئیرادەی ئاشتی لە رێگەی هەنگاوی یاسایی و سیاسییەوە گرەنتی بکرێت، بەتایبەت کە لە ئێستادا دەرفەتێکی مێژوویی لەبەردەم دەسەڵات و لایەنەکانی تورکیادایە بۆ گەیشتن بە چارەسەرێکی گشتگیری دیموکراسی.

لە کۆتاییدا، ئۆجەلان ئاماژەی بەوە کردووە کە پێشهاتە هەرێمییەکان لە ئاستێکی زۆر هەستیاردان و پڕۆسەکە لەسەر هاوکێشەی زۆر ورد بەڕێوە دەچێت. لە هەمان کاتدا هۆشداریی لە سەرجەم هەوڵە تێکدەرانەکان داوە و جەختی لە گرنگیی بەردەوامیی گفتوگۆ و دیالۆگەکان کردووەتەوە، بەتایبەتی بە مەبەستی رێگریکردن لە دروستبوونی هەر جۆرە ئاڵۆزی و گرژییەک لە رۆژئاوای کوردستاندا.