ئاماژە بەوەشکراوە، لە لێکۆڵینەوە سەرەتاییەکاندا دەرکەوتووە کە بەشێک لەو موڵکانە بە ناوی هاوسەری تۆمەتبارەکە، دایک و باوکی، کەسوکاری و هەندێک لە ڕاییکەرانی مامەڵەکانەوە تۆمار کراون، بە مەبەستی شاردنەوەی خاوەندارێتییە ڕاستەقینەکەیان و خۆدزینەوە لە بەرپرسیارێتیی یاسایی، لە کاتێکدا تۆمەتبارەکە لەو کەسانەیە کە پابەندە بە پێشکەشکردنی کۆدی سامانی داراییەوە.

هەروەها لە پشکنینەکەدا دەست بەسەر ژمارەیەک تاپۆ و تۆماری خانووبەرە، ٣١ بەیاننامەی واژۆکراو بە پەنجەمۆر لەسەر سپی، چوار کۆمپیوتەر کە یەکێکیان کۆمپیوتەری تایبەت بە کردنەوەی «بارکۆد» و هی فەرمانگەی تۆماری خانووبەرەی سەڵاحەدین بووە و لە ماڵی تۆمەتبارەکەدا دانرابوو لەگەڵ بڕێک پارەی عێراقی و دۆلاری ئەمریکی، سندوقێکی بژێوی پڕ لە زێڕ، گرێبەستی کڕین و مامەڵەی هاووڵاتییان و ئۆتۆمبیلێکی مۆدێرندا گیراوە.

هاوسەری تۆمەتبارەکە لە لێکۆڵینەوەکاندا دانی بەوە نا کە نزیکەی ٢٧ موڵک بە شێوەیەکی ڕووکەشی بە ناوی ئەوەوە تۆمار کراون، هاوکات موڵکەکانی تریش بە ناوی کەسوکاری و ژمارەیەک ڕاییکەری مامەڵەکانەوە کراون و سەرچاوەی دارایی کڕینیان دەگەڕێتەوە بۆ وەرگرتنی بەرتیل لە هاوڵاتییان و سوودوەرگرتن لە پۆستی فەرمی.

لە کۆتاییدا، پەڕاوی لێکۆڵینەوە و سەرجەم کەرەستە دەستبەسەرداگرتراوەکان ڕادەستی دادوەر کراون، و دادوەری لێکۆڵینەوەی دادگای سەڵاحەدین تایبەت بە دۆسیەکانی دەستپاک، پاش وەرگرتنی وتەکانی، بڕیاری داوە تۆمەتبارەکە بەپێی ماددەی ٣٦ لە یاسای بەرەنگاربوونەوەی سپیکردنەوەی پارە و پارەدارکردنی تیرۆر ژمارە ٣٩ـی ساڵی ٢٠١٥، ڕابگیرێت.