سەرۆک وەزیرانی عێراق، فەرمانی بە پێکهێنانی تیمێکی نیشتمانیی هاوبەش کرد بۆ بەرزکردنەوەی پۆلێنی قەرزی سەروەریی عێراق و بەهێزکردنی پێگەی دارایی و ئابووریی وڵات لەسەر ئاستی نێودەوڵەتی.
ئەمڕۆ چوارشەممە ٢٠ـی ئابی ٢٠٢٥، نووسینگەی سەرۆک وەزیرانی عێراق راگەیەندراوێکی بڵاوکردەوە و دەڵێت، تیمەکە بە سەرۆکایەتیی پارێزگاری بانکی ناوەندییە و نوێنەری وەزارەتەکانی دارایی، نەوت، پلاندانان، دەستەی کاخەزە داراییەکان و کەرتی بانکی لەخۆدەگرێت.
لە
راگەیەندراوەکەدا ئاماژە بەوەشکراوە، ئەرکی سەرەکیی تیمەکە داڕشتنی ستراتیژییەتێکی
گشتگیرە بە ئامانجی روون و شیاوی پێوانەکردن، هەروەها هەماهەنگیکردن لەگەڵ ئاژانسە
گەورەکانی پۆلێنکردنی قەرزی جیهانی.
باس
لەوەشکراوە، ئەو هەنگاوە لە چوارچێوەی روانگەی حکومەتە بۆ بەهێزکردنی متمانەی
نێودەوڵەتی بە ئابووریی نیشتمانی و کردنەوەی دەرگای فراوانتر لە بەردەم
وەبەرهێنانی راستەوخۆ و ناڕاستەوخۆی بیانی.
ئەوەش
خراوەتەڕوو، حکومەتی عێراق جەخت دەکاتەوە کە ئەم کارە پابەندبوونی روونی بە
بەرنامەی چاکسازی و پەرۆشیی بۆ بەدیهێنانی سەقامگیریی ئابووری پیشان دەدات،
هەروەها ئامانجی دابینکردنی ژینگەیەکی لەباری وەبەرهێنانە کە ببێتەهۆی زیادکردنی
سەرچاوەکانی داهات و کەمکردنەوەی پشتبەستن بە نەوت.