PM:11:54:13/08/2025
2068 جار خوێندراوەتەوە
كارو كاروباری كۆمەڵایەتی هەرێم، لە بەرامبەر پەیوەندیكردن بە خانەوادەی خاوەن پێداویستی تایبەتەكان بەمەبەستی دابینكردنی مووچە، روونكردنەوە دەدات و دەڵێت، "ئەم بابەتە پەیوەندی بە ئێمەوە نییە و بەشێكە لە فێڵكردن، رێكاری یاسایش لەوبارەیەوە دەگرینەبەر".
ئەمڕۆ چوارشەممە ١٣ـی ئابی ٢٠٢٥، وەزارەتی كارو كاروباری كۆمەڵایەتی هەرێم لە روونكردنەوەیەكدا بڵاویكردەوە، ماوەی چەند رۆژێكە ژمارەیەكی نەناسراو بەناوی چاودێری كۆمەڵایەتی و وەزارەتەکەیانەوە پەیوەندی بە خانەوادەی خاوەن پێداویستی تایبەتەكان دەكات بەمەبەستی دابینكردنی مووچەی كەم ئەندامی و مووچەی چاودێری كۆمەڵایەتی.
هەروەها داوای ناردنی
كارتی نیشتیمانی و زانیاری و پێدانی ژمارە و ناوی خەڵكی تر كە خاوەن پێداویستی
تایبەت یان نەخۆش یان كەسانی بەساڵاچوویان هەبێت و دواتر بەناوی ئەوانەوە پەیوەندی
بەو خانەوادانە دەكات و داوای كارتی مۆبایل و تەحویلكردنی دەكات، كە بەداخەوە
ژمارەیەك هاوڵاتی زەرەرمەندی ئەم فێڵكردنە بوونەتەوە.
وەزارەتی كارو
كاروباری كۆمەڵایەتی دەشڵێت، بە هەموولایەك رادەگەیەنن كە ئەوان ئاگاداری ئەم
بابەتە نین و ئەمە بەشێكە لە فێڵكردن و ئەوان لەكاتی پێویست لە رێگا فەرمییەكانەوە
خزمەتگوزاری و ئاگادارییەكانی بڵاودەکەنەوە، بەرامبەر بەم فێلكردنەی ئەم گروپانەش،
رێكاری یاسایی دەگرنەبەر.
