AM:10:50:09/08/2025
24544 جار خوێندراوەتەوە
دوای هەشت مانگ تا ئێستا هیچ خانەنشینێک لە هەرێم ئیکرامیەی وەرنەگرتووە و بەپێی زانیارییەکانیش پەیوەندی بە نەبوونی سندوقی خانەنشینی و دیارنەمانی پارەکەوە هەیە؛ وتەبێژی خانەنشینانی هەرێمیش لەبارەی نەهاتنی شەش مووچەی خانەنشینان دەڵێت،" پەیوەندی بە بەغداوە نییە و پێویستە حکومەتی ماوەبەسەرچوو لەسەر داهاتی فەرمانگەکانی خۆیان خەرجی بکات".
ئەمڕۆ شەممە ٩ـی ئابی ٢٠٢٥، هەرێم سادق عوسمان، وتەبێژی خانەنشینانی هەرێم بە ئێن ئاڕ تی وت، تا ئێستا هیچ ئیکرامیەیەکی خانەنشینان خەرجنەکراوە، ئەمەش بەهۆی کێشە داراییەکانی نێوان هەرێم و بەغدایە، پاداشتی کۆکراوەی مۆڵەتیش کە شەش مووچەیە بەسەر یەکەوە تا ئێستا لە بەشێکی هەرێم نەدراوە.
وتەبێژی
خانەنشینانی هەرێم باسی لەوەشکرد، ئەو شەش مووچەیە پەیوەندی بە بەغداوە نییە و
پێویستە لەسەر داهاتی فەرمانگەکانی خۆیان خەرجبکرێت.
هەروەها بە
گوێرەی زانیارییەکانی ئێن ئاڕ تی، نەناردنی ئیکرامیەی خانەنشینانی هەرێم پەیوەندی
بە نەبوونی سندوقی خانەنشینی و دیارنەمانی پارەکەوە هەیە.
وتەبێژی
خانەنشینانی هەرێم دەشڵێت، لە سەرەتای ئەمساڵەوە زیاتر لە ٣٥ هەزار فەرمانبەر
خانەنشین کران و تا ئێستا بەشێکیشیان نەک ئیکرامیە بەڵکو مووچەکانیشیان بۆ
خەرجنەکراوە.
