دوای نزیکەی شەش مانگ لە رووداوی گیان لەدەستدانی پەیامنێر و هاوکارمان وریا حەمە کەریم، ئەمڕۆ لە دادگای سلێمانی یەکەم دانیشتنی دادگایکردنی ئەو شۆفێری بارهەڵگرەی کە بووە هۆی گیان لەدەستدانی وریا و هاوڵاتییەکی تر بەڕێوەچوو.
دادگای سلێمانیش دەڵێت، دۆسیەکە لە دادگای شارەزوورەوە گواستراوەتەوە بۆ دادگاکەیان، لە یەکەم دانیشتنی کەیسەکەدا دادوەر سەرەتا زانیارییە کەسیەکانی تۆمەتباری وەرگرت، دواتر بە وردی گوێی لە کەسوکاری وریا حەمە کەریم و هاوڵاتییەکەی دیکە گرت.
لە کۆتایی دانیشتنەکەشدا دادگای سلێمانی بڕیاری بەردەوامی دادگاییکردنی
شۆفێرەکەیدا و دادبینیەکەشی بۆ ١٩ـی ئەم مانگە دواخست.
شەش مانگ پێش ئێستا، لە بەرەبەیانی شەشی مانگی شوباتی ئەمساڵ، لە بەرەبەیانێکی
کڕێوەدا کاتێک وریا حەمەکەریم لەرێگایدا بوو بەرەو سلێمانی، ئۆتۆمبیلێک دەبینت کە لە
قەراغی رێگای عەربەت - سلێمانی پەکیکەوتووە، بە نیەتی هاوکاریکردنی شۆفێرەکە وریا دەوەستێت،
لەو کاتەدا کە هەردووکیان خەریکی چاککردنەوەی ئۆتۆمبیلەکە بوون، بارهەڵگرێک بە
خێراییەکی زۆر خۆی دەکێشێت پێێاندا و هەر لەوێدا وریا حەمە کەریم و هاوڵاتیەکەی تر
گیان دەسپێرن.
وریا حەمە کەریم بۆ هەمیشە ماڵئاوایی لێکردین و نەک هەر ئێمە و کەسوکاری و
هاوپیشەکانى، بەڵکو ژمارەیەکی زۆر لە خەڵکیش بە کۆچی دوایەکەی خەمبار کرد.
وریا حەمە کەریم، یەکێک بوو لە رۆژنامەنووسە دیارەکانی هەرێمی کوردستان و ماوەى
١٢ ساڵ پەیامنێر و پاشان پێشکەشکاریکەناڵی ئێن ئاڕتی بوو، وریا تاقانە و بەرکەوتەی
چەکی کیمیایی بوو و لەدوای خۆیشی دوو منداڵی بەجێهێشت.