وەزیری دەرەوەی ئێران ئەمشەو گەیشتە مۆسكۆی پایتەختی رووسیا و بڕیارە لەگەڵ سەرۆكی رووسیا كۆببێتەوە و هێرشی سەربازیی ئەمریکا و ئیسرائیل بۆ سەر وڵاتەكەی تاوتوێ بكەن.
ئەمڕۆ یەکشەممە ٢٢ـی حوزەیرانی ٢٠٢٥، ئاژانسی هەواڵی فەرمی ئێران (ایرنا) بڵاویکردەوە، عەباس عێراقچی، وەزیری دەرەوەی ئێران گەیشتووەتە مۆسکۆ و لەگەڵ ڤلادیمێر پوتن، سەرۆکی رووسیا و بەرپرسانی باڵای رووسیا سەبارەت بە پرسە ناوچەیی و نێودەوڵەتییەکانی پەیوەست بە هێرشەکانی ئەمریکا و ئیسرائیل بۆ سەر ئێران گفتوگۆ دەكات.
هاوکات عەباس
عێراقچی، رۆژی شەممە لە میانەی کۆنگرەیەکی رۆژنامەنووسیدا لە ئەستەنبوڵ دەڵێت، سەردانی
مۆسکۆ دەکات و لەگەڵ ڤلادیمێر پوتن کۆدەبێتەوە و هاوکات سەردانەکە لە چوارچێوەی
"هاوبەشی ستراتیژی" نێوان هەردوو وڵاتدا دێت.
ئاماژەی
بەوەشکرد، تاران لە چەند مانگی رابردوودا بەردەوام رووسیای لە
وردەکارییەكانی دانوستانە ئەتۆمییەکانی لەگەڵ واشنتن ئاگاداركردووەتەوە.
ئەوەش
لەكاتێكدایە شەوی رابردوو، ئەمریکا سێ دامەزراوەی ئەتۆمی ئێرانی لە نەتەنز، فۆردۆ
و ئەسفەهانی کردە ئامانج. سەرۆكی ئەمریكا هێرشەكەی بە "سنووردارکردنی توانا
ئەتۆمییەکانی ئێران" وەسف کرد و هۆشداریشی دا لە دەرئەنجامی قورستر، ئەگەر
تاران رازی نەبێت بە "کۆتاییهێنان بەم شەڕە".
عەباس عێراقچی
لە لێدوانێکدا، هێرشەکانی ئەمریکای بە "خیانەت لە دیپلۆماسی" ناو برد و
جەختی لەوەکردەوە کە وڵاتەکەی هەموو رێوشوێنێکی پێویست بۆ پاراستنی ئاسایشی
دەگرێتەبەر.
لایخۆیەوە رووسیا
سەركۆنەی هێرشەکانی ئەمریکای کرد و بە پێشێلکردنی ئاشکرای یاسا نێودەوڵەتییەکان و
میساقی نەتەوە یەکگرتووەکان و بڕیارنامەکانی ئەنجومەنی ئاسایشی وەسفکرد و داوای لە
ئاژانسی نێودەوڵەتی وزەی ئەتۆمی کرد وەڵامی رووداوەکان بداتەوە.