وتیشی، ئەم هەڵکشانە سەربازییە مەترسییەکی جددی لەسەر ئاشتی و ئاسایشی رۆژهەڵاتی ناوەڕاست دروستدەکات و سەقامگیریی ناوچەکە بەشێوەیەکی جددی دەخاتە مەترسییەوە.

ئاماژەی بەوەشکرد، عێراق بەکارهێنانی هێز لە پەیوەندییە نێودەوڵەتییەکاندا رەتدەکاتەوە و داوای رێزگرتن لە سەروەریی دەوڵەتان و بەئامانج نەگرتنی دامەزراوە گرنگەکانیان دەکات، بەتایبەتی ئەوانەی لەژێر چاودێریی ئاژانسی نێودەوڵەتیی وزەی ئەتۆمیدان و بۆ مەبەستی ئاشتییانە بەکاردەهێنرێن.

روونیشیکردەوە، بەردەوامبوونی ئەم هێرشانە دەبێتە هۆی پەرەسەندنی مەترسییەکان و دەرئەنجامەکەی کاریگەریی لەسەر سەقامگیریی ناوچەکە و هەموو جیهان دەبێت.

باسی لەوەشکرد، عێراق لەسەر بنەمای بەرپرسیارێتی خۆی بەرامبەر بە ئاشتی و سەقامگیری ناوچەیی و نێودەوڵەتی، داوای دەستبەجێی هێورکردنەوە و کردنەوەی کەناڵی دیپلۆماسی بەپەلە دەکات بۆ لەخۆگرتنی دۆخەکە و هەوڵدان بۆ نەهێشتنی قەیرانەکان، بەشێوەیەک ئاسایشی هاوبەش دەستەبەر بکات و رێز لە یاسا نێودەوڵەتییەکان و پەیماننامەی نەتەوەیەکگرتوەکان بگرێت.

حکومەتی عێراقیش بڵاویکردەوە، دەبێت وڵاتانی زلهێز بەرپرسیاریەتیی رزگارکردنی جیهان لە قەیرانی زیاتر بگرنە ئەستۆیان، نەک خراپتر کردنی بارودۆخەکە.