AM:09:35:21/06/2025
2268 جار خوێندراوەتەوە
سەرۆکی روسیا دەڵێت، وڵاتەکەی گرێبەستی لەگەڵ ئێران واژۆ کردووە بۆ بونیادنانی دوو وێستگەی ئەتۆمی دیكە لە شاری بوشەهر، ئەوە جگە لەو وێستگەیەی کە ئێستا هەیە و ٦٠٠ کرێکاری روسی تیایدا کاردەکات، وتیشی، سەرۆکوەزیرانی ئیسرائیل دڵنیایی داوە لە سەلامەتی کرێکارەکان.
ڤلادیمێر پوتن، سەرۆکی روسیا، لە میانەی کۆڕبەندی ئابووری نێودەوڵەتی لە سانت پترسبۆرگ بڵاویکردەوە، دوو وێستگەی دیكەی ئەتۆمی لە بوشەهر دروستدەكەن و سەرەڕای خراپی دۆخی ئەمنی ناوچەکە، کارکردن لەسەر ئەو وێستگانە بەردەوامە.
پێشتر ئاماژەی
بەوە کردووە، کە ژمارەی ئەو کارمەندە روسانەی کە لە کارگەی بوشەهر کاردەکەن نزیکەی
٦٠٠ کەسە.
سەرۆكی روسیا
باسی لەوەشكرد، بنیامین نەتەنیاهۆ، سەرۆکوەزیرانی ئیسرائیل، رەزامەندی دەربڕیوە
لەسەر دڵنیابون لە سەلامەتی کرێکارانی ئەو دامەزراوەیە، لە شاری بوشەهری ئێران كە
دەكەوێتە کەنداوەوە.
پوتن بە
سەرنجدان لە ململانێی بەردەوام لەگەڵ ئیسرائیل، پشتیوانی خۆی بۆ مافی ئێران
بەمەبەستی بەکارهێنانی ئاشتیانەی وزەی ئەتۆمی دوپاتکردەوە و جەختی لەوەکردەوە کە
هەڵوێستی روسیا لەو بارەیەوە نەگۆڕاوە و ئەوان بەرگری لە مافی ئێران دەکەن بۆ
بەکارهێنانی ئاشتیانەی وزەی ئەتۆمی.
ئەمەش لەکاتێکدایە، بەرەبەیانی رۆژی هەینی ١٣ی حوزەیران، ئیسرائیل
هێرشەکانی بۆ سەر بنکە ئەتۆمییەکانی ئێران دەستپێکرد و چەندین سەرباز و زانای
ئەتۆمیش کوژران، هەمان شەو ئێران هێرشی پێچەوانەی دەستپێکرد و هەڵوێستی هەر یەک لە
ئەمریکا و روسیا و وڵاتانی دراوسێ جیاوازبوو، شەڕی هەردوو وڵات تا ئێستاش بەردەوامە.
