وەزارەتی نەوتی عێراق دەڵێت، پێویستە حکومەتی ماوەبەسەرچووی هەرێم پابەند بێت بە دەستوور و دەستبەجێ رادەستکردنی نەوت دەستپێبکاتەوە و وتیشی، قاچاغکردنی نەوت لە هەرێمەوە بۆ دەرەوەی عێراق بەردەوامە و حکومەتی ماوەبەسەرچوو لێی بەرپرسیارە.
ئەمڕۆ پێنجشەممە ٥ی حوزەیرانی ٢٠٢٥، وەزارەتی نەوتی عێراق لە راگەیەندراوێکدا بڵاویکردەوە، پێویستە حکومەتی ماوەبەسەرچووی هەرێم پابەندبێت بە دەستوور و بڕیارەکانی دادگای فیدراڵی و یاسا کارپێکراوەکان، لەوانەش یاسای بوودجەی گشتی.
وتیشی، یاسای بوودجەی گشتی حکومەتی ماوەبەسەرچوو
پابەند دەکات بە رادەستکردنی نەوتی بەرهەمهێنراو لە کێڵگەکانییەوە بۆ وەزارەتی نەوتی
فیدراڵی و دواتر پڕکردنەوەی داهات بۆ خەزێنەی گشتی.
ئاماژەی بەوەشکرد، پێشتر نوسراوی فەرمی
و شاندیان ناردووە بۆ حکومەتی ماوەبەسەرچوو بۆ گەیشتن بەو ئامانجە، بەڵام ئەوان هیچیان لە
بارەوە نەکردووە.
باسی لەوەشکرد، پێویستە دەستبەجێ رادەستکردنی
نەوت دەستپێبکاتەوە کە لە یاسای بوودجەی گشتیدا ئاماژەی پێکراوە و بە رێککەوتن لەگەڵ
حکومەتی ماوەبەسەرچوو دەرچووە.
جەختی لەوەشکردەوە، حکومەتی ماوەبەسەرچوو بە هۆی
پابەندنەبوونی بە دەستوور و رادەستنەکردنی نەوت، عێراق دووچاری قەیرانی دارایی دەکاتەوە
و پەیوەندییە نێودەوڵەتییە نەوتییەکانی دەخاتە مەترسییەوە، ئەمەش بووەتە هۆی ئەوەی دووهێندە زیان بە هەناردەکردنی نەوتی عێراق
و خەزێنەی گشتی بگات.
ئەوەشی خستەڕوو، زانیارى تەواویان لەسەر
فەرهودکردنى نەوت لە هەرێمى کوردستان لەبەردەستدایە و بەرپرسیارەتییەکەشى لە
ئەستۆى هەرێمە و ئەوەش زیانى زۆرى لە پشکى عێراقداوە لە رێکخراوى ئۆپیک
لە کۆتایی
راگەیەندراوەکەیدا هاتووە، بەدواداچوون بۆ ئەو زانیارییانە دەکەن، کە ئاماژە بە
بەردەوامی قاچاغی نەوت لە هەرێمەوە بۆ دەرەوەی عێراق دەکەن و حکومەتی ماوەبەسەرچوو لەو رووەوە بە بەرپرسیار دەزانن.
ئەوەش لەکاتێکدایە، چەندینجارە
دەستپێکردنەوەی هەناردەی نەوت دەگاتە قۆناغەکانی کۆتایی و پارتی و یەکێتی لە پێناو
بەردەوامیدان بە قاچاچێتی خۆیان بەربەست بۆ رێکارەکان دروست دەکەن و رێگرن لە
دەستپێکردنەوەی هەناردەی نەوت.
ڤـ.ر