وەزارەتی ناوخۆی عێراق رایگەیاند، لە ریزبەندی لوتکەی پۆلیسی جیهانیدا و لەکۆی ١٣٨ وڵات پلەی سێیەمیان بەدەستهێناوە لە بەرەنگاربوونەوەی ماددەی هۆشبەردا.
وەزارەتی ناوخۆی عێراق لە راگەیەندراوێکدا بڵاویکردووەتەوە، عێراق بەردەوامە لە بەرەنگاربوونەوەی ماددە هۆشبەرەکان و کارتێکەرە عەقڵییەکان و بووە بەیەکێک لەو وڵاتانەی رکابەری لەگەڵ وڵاتانی دیکەدا دەکات.
ئاماژەی بەوەشکردووە، لە چوارەمین لوتکەى پۆلیسى
جیهانى کە پۆلیسى دوبەى رێکیخستبوو، پلەی سێیەمیان لەنێو ١٣٨ وڵات و ٢٠٥ رێکخراویی
حکومی و ناحکومی بەدەستهێناوە و لە دواى هیندستان و مۆنتینیگرۆ کە پلەى یەکەم و
دووەمیان گرتووە.
وتیشی، بەردەوامن لە هەڵوەشاندنەوەی تۆڕەکانی
بازرگانیی ماددەی هۆشبەر و پاراستنی گیانی هاوڵاتییان و پتەوکردنی سەقامگیری و
ئاسایش لە وڵاتەکەدا.
بە گوێرەى ئامارێکى بەڕێوەبەرایەتیی گشتیی
کاروبارى ماددە هۆشبەرەکان و کارتێکەرە عەقڵییەکان لە وەزارەتى ناوخۆى عێراق، لە
چارەکى یەکەمى ئەمساڵدا دوو تەن و ١٦٦ کیلۆگرام ماددەى هۆشبەر دەستیبەسەرداگیراوە
و زیاتر لە سێ هەزار تۆمەتبار دەستگیرکراون.