چاوگێكیش بە ئێن ئاڕ تی راگەیاند، نرخی نوێی کارەبا گرانەکە لە پرۆژەی رووناکی لە ٧٢ دینارەوە بۆ ٣٥٠ دینار دەبێت و تاوەکو کۆتایی ئەمساڵ سەنتەری هەر چوار پارێزگای هەرێمی کوردستان دەکرێنە ٢٤ کاتژمێریی و بۆ کۆتایی ساڵی ٢٠٢٦ تەواوی هەرێمی کوردستانیش دەبێتە کارەبای ٢٤ کاتژمێری.
ئەمڕۆ چوارشەممە ١٤ـی ئایاری ٢٠٢٥، پێشەوا هەورامانی، وتەبێژی حکومەتی کاربەڕێکەر لە کۆنفراسێکی رۆژنامەوانیدا رایگەیاند، تا کۆتای ئەمساڵ پڕۆژەی رووناکی لە تەواوی سەنتەری شارەکان جێبەجێدەکرێت و لە سەرەتاوە داشکاندنێک بۆ کارەبا گرانەکە دەکرێت.
ئاماژەی بەوەشکرد، نزیكەی ٨٠٪ـی خەڵك بەهۆی
پرۆژەی روناكییەوە دەتوانن پارەیەكی كەمتر لە جاران بدەن بۆ ئەوەی كارەبایەكی ٢٤
كاتژمێرییان دەستبكەوێت.
وتیشی، پلانی حكومەت ئەوەیە تا كۆتایی ئەمساڵ
پرۆژەكە لە سەنتەری هەموو شارەكان تەواو ببێت و دواتریش بەرەو ناوچەكانی تر درێژ
ببێتەوە.
باسی لەوەشکرد، ئەوانەی بەشداری پرۆژەكە دەكەن،
لە سێ مانگی یەكەمدا بەرێژەی ٢٥٪ و ٥٠٪ و ١٥٪ حكومەتی کاربەڕێکەر پاڵپشتییان دەكات
بۆ ئەوەی خۆیان رابهێنن لەگەڵیدا.
هەروەها، لیژنەیەكی باڵا چاودێریی پرۆژەكە دەكات
تا پرۆژەكە هەموو هەرێمی كوردستان دەگرێتەوەو سەرۆکی حکومەتی کاربەڕێکەر سەرپەرەشتی
لیژنەكە دەكات.