AM:09:40:11/05/2025
1404 جار خوێندراوەتەوە
ئەمڕۆ گەڕی چوارەمی دانوستانەکانی نێوان ئەمریکا و ئێران لەسەر بەرنامەی ئەتۆمی ئێران لە عومان بەڕێوەدەچێت بەرپرسێکی باڵای ئێران لەو بارەیەوە دەڵێت، ئەمریکا جدی نییە لە دانوستانەکانی لەگەڵ تاران سەبارەت بەرنامەی ئەتۆمیەكەی، ئاشكراشیكردووە، وڵاتەکەی بەكرداريی دەستیکردووە بە ئامادەکاری بۆ سیناریۆی شكستهێنانی دانوستانەكان.
ئەمڕۆ یەکشەممە ١١ـی ئایاری ٢٠٢٥، بەرپرسە باڵاكەی ئێران، كە بۆ تۆڕی هەواڵی سی ئێن ئێنی ئەمریکی، باسی لە هەڵسەنگاندنەکانی ناو ئێران کردووە بەوەی، ئەم دانوستانانە هەر لە سەرەتاوە وا داڕێژراوە بۆ ئەوەی تەڵەیەک بێت بۆ كێشكردنی ناوچەکە بەرەو گرژیی زیاتر.
وتیشی، واشنتۆنی تۆمەتبار کردووە بەوەی، گەمەیەکی
سیاسی و میدیایی پەیڕەو دەكات، لە رێی پچڕان و دروستكردنی كەلێنی هەفتانەی بێ
پاساو لە رەوتی دانوستانەکاندا، جەختیشیکردەوە لەوەی، وڵاتەکەی خوازیاری ئەم
شێوازە لە دانوستانی پچڕپچڕ نیە.
ئاماژەی بەوەشکردووە، لایەنی ئەمریکی ئامادە نییە
بۆ بەشداریکردن لە گفتوگۆی سیاسی یان تەکنیکی ئامانجدار ، وەڵامەکانی واشنتۆن کورت
و گشتین، و زۆرجاریش پێشنیازە سەرەکییەکانی ئێران پشتگوێ دەخەن، لەکاتێکدا
هەڵوێستی ئەمریکا بەردەوام لە گۆڕاندایە.
قسەكانی ئەو بەرپرسە باڵایەی ئێران لەكاتێكدایە،
ستیڤ ویتكۆف، نێردەی تایبەتی سەرۆكی ئەمریكا كە سەرۆكایەتی شاندنی وڵاتەكەی دەكات
لە دانوستانەكانی لەگەڵ ئێران، لەدواین چاوپێكەوتنی تەلەفیزیۆندا وتی، ئەگەر
دانیشتنەكانی رۆژی یەك شەممەی داهاتوو لەگەڵ ئێران بەرهەمدار نەبن، ئەوا ئەمریكا
كۆتایی بە دانوستانەكانی دەهێنێت و رێگایەكی تر دەگرێتەبەر.
