ئه‌ندامێكی لیژنەی تەندروستیی پەرلەمانی عێراق رایگەیاند، ڤه‌یپ و جگه‌ره‌ی ئه‌لیكترۆنی وەک بۆمبی ژه‌هراوین، هاوكات وتیشی، هاوڵاتییانی عێراق رۆژانە نزیکەی سێ ملیار دینار بۆ جگەرەکێشان خەرج دەکەن.
ئەمڕۆ شه‌ممه، ١٠ـی ئایاری ٢٠٢٥، زه‌ینه‌ب موسه‌وی، ئەندامی لیژنەی تەندروستیی پەرلەمانی عێراق لە لیدوانێکدا باسی لەوەکرد، ڤه‌یپ و جگه‌ره‌ی ئه‌لیكترۆنی بۆمبی ژه‌هراوین و بە تامی سروشتی رووپۆشکراون.
ئاماژه‌ی به‌وه‌ش کرد، لیژنەكه‌یان دەنگی بە
پێشنیازیی قەدەغەکردنی جگەرەی ئەلیکترۆنی به شێوه‌یه‌كی هەمیشەیی دا و
پێشنیازەکەی ئاراستەی سەرۆکایەتیی پەرلەمانی عێراق کرد.
وتیشی، جگەرەی ئەلیکترۆنی و ڤه‌یپ کاریگەریی
لەسەر سیستمی هەناسەدان هەیە و توانای هه‌یه مەترسی لەسەر ژیانی مرۆڤ دروست بکات،
ئەمەش مەترسی تووشبوون بە تەنگەنەفەسی و هەوکردنی بۆرییەکانی هەناسە زیاد دەکات.
ناوبراو جه‌ختیشی كردووه‌ته‌وه، عێراقییەکان رۆژانە
نزیکەی سێ ملیار دینار بۆ جگەرەکێشان خەرج دەکەن، لە کاتێکدا جگەرە ئەلیکترۆنیەکان
هاندەری بەکارهێنانی ماددەی هۆشبەرن.