دادگاى باڵای فیدراڵیى عێراق، سکاڵاى ژمارەیەک پەرلەمانتارى رەتکردەوە بۆ دەرکردنی فەرمانی وەلائی بۆ راگرتنی کارکردن بە یاسای بەپارێزگاکردنی هەڵەبجە.
ئەمڕۆ شەممە ١٠ـی ئایارـی ٢٠٢٥، دواى ئەوەى پەرلەمانى عێراق بڕیاری بەپارێزگاکردنی هەڵەبجەی دا و سەرۆککۆمارى عێراق واژۆى کرد، پێنج پەرلەمانتار سکاڵایەکیان لە دادگای فیدراڵى تۆمارکرد و داوایان کرد فەرمانێکی وەلائی دەربکات بۆ رێگریکردن لە کارکردن بەو یاسایە.
هەروەها، داوایان کرد دادگاى باڵای فیدراڵیى
عێراق فەرمانێکی وەلائی دەربکات بۆ رێگریکردن لە کارکردن بەو یاسایە، چونکە بە
بڕوای ئەوان، دانیشتنەکە نایاسایی بووە و رێژەى یاسایى پەرلەمانتاران تێیدا ئامادە
نەبوون.
دادگەى فیدراڵیى عێراقیش رایگەیاند، بە گوێرەی
یاسای دادگاکە، دەرکردنی فەرمانی وەلائی لەسەر بنەمای مەرج و بنەمای دیاریکراوە،
لەم دۆسیەیەشدا بە پێویستی نازانێت فەرمانێکی وەلائی دەربکات.
ئەوەش لە کاتێکدایە، دووشەممە ١٤ـی نیسانـی ٢٠٢٥،
پەرلەمانی عێراق پڕۆژە یاسایی بە پارێزگابوونی هەڵەبجەی پەسەند کرد و بەپێی بڕیاری
پەرلەمانی عێراق هەڵەبجە بووە ١٩ـەیەمین پارێزگای عێراق، هەروەها، نەوەی نوێ پێشتر
١٧ نوسراویان بۆ بە پارێزگاکردنی هەڵەبجە کردبوو تا پڕۆژە یاساکە لە حکومەتەوە
چووە پەرلەمان.