پەرلەمانتارێکی نەوەی نوێ لە پەرلەمانی عێراق رایگەیاند، پابەندنەبوونی حکومەتی هەرێم بەرێکەوتنەکانی لەگەڵ بەغدا هۆکاری دواکەوتنی مووچەیە و سەرۆکی جوڵانەوەی نەوەی نوێ و فراکسیۆنەکەیان لەگەڵ بەغدا قسەیان کردووە مووچە بنێردرێت و لەرێگەی بەرپرسانەوە لەبەغدا لە پەیوەندیدان مووچەی هەرێم تێکەڵاوی ململانێکان نەکرێت.
ئەمڕۆ پێنجشەممە ٨ـی ئایارـی ٢٠٢٥، ئومێد محەمەد، پەرلەمانتاری نەوەی نوێ لە پەرلەمانی عێراق رایگەیاند، ئەنجومەنی وەزیران و وەزارەتی دارایی عێراق نوسراویان بۆ دادگای فیدڕاڵی کردووە سەبارەت بە پابەندنەبوونی هەرێم و لەنوسراوەکەیاندا ئاماژەیان بەوەداوە هەرێم داهاتی ناوخۆی بەتەواوەتی نەگەڕاندوەتەو بۆ بەغدا.
وتیشی، نەوەی نوێ هەموو هەوڵێکی لەبەغدا خستوەتەگەڕ بۆ ناردنی مووچەی
فەرمانبەرانی هەرێم و شاسوار عەبدولواحید داوای لەسودانی کردووە موچەی هەرێم
رەوانە بکات و فەرمانبەران نەکرێنە قوربانی و داواشیان لە بەغدا کردووە لەبەر
گەندەڵییەکانی پارتی و یەکێتی فەرمانبەرانی هەرێم سزانەدرێن.
ئاماژەی بەوەشکرد، هیچ
کەس و لایەنێک باوەڕ بەوەناکات داهاتی ناوخۆی هەرێم نزیکەی ٥٠ ملیار دینار بێت و تەیف
سامی چاوەڕێی روونکردنەوەی دادگای فیدڕاڵییە.
هەروەها، زیاتر لەشەش مانگە هەڵبژاردن تەواو بووە و لەهەرێم پەرلەمان
ناتوانێت کۆببێتەوە، پارتی و یەکێتی لەپێناو پۆست پلەو بەرژەوەندی خۆیان
پەرلەمانیان پەکخستووە بۆیە سکاڵامان لەسەرۆکی هەرێم کردووە لەدەسەڵاتیدایە
پەرلەمان هەڵبوەشێنێتەوە و نەیکردووە و سکاڵاکەی نەوەی نوێ بۆ ئەوەیە پەرلەمان کار
بۆ خزمەتی هاوڵاتیان بکات.
باسی لەوەشکرد، نەوەی نوێ دەیەوێت هاوپەیمانییەکی بەهێز دروست بکات
بەرامبەر بە یەکێتی و پارتی راستەوخۆ قسەی لەگەڵ لایەنەکان کردووە و تا ئێستا
یەکگرتوو و بەرەی گەل ئامادەن، هەرچەندە نەوەی نوێ لەم هاوپەیمانێتییە زەرەریش
دەکات بەڵام مەبەستیان کۆکردنەوەی لایەنەکان و خزمەتی هاوڵاتیانە و شاسوار
عەبدولواحید، زۆر مکوڕە لەسەر دروستکردنی هاوپەیمانێتییەکی بەهێز بەرامبەر پارتی و
یەکێتی، لەدوو رۆژی داهاتوودا هەوڵدەدەن کۆبوونەوەی لایەنەکانی دەرەوەی پارتی و
یەکێتی ئەنجامبدرێت و بە دروستکردنی هاوپەیمانییەک لە لایەنە ناڕازییەکان گورزێکی
کوشندە بەر پارتی و یەکێتی دەکەوێت.