AM:11:34:06/05/2025
1584 جار خوێندراوەتەوە
بەیانی ئەمڕۆ بەشێک لەپزیشکانی نارازی لە هەولێر و سلێمانی گردبوونەوە، پزیشکانی هەولێر لە بەردەم وەزارەتی تەندروستی گردبوونەوە و پەیامێکیان ئاراستەی حکومەتی کاربەڕێکەر کرد و رایانگەیاند، داوکارییەکانیان لەلایەن وەزارەتی تەندروستییەوە پشتگوێ خراون، هاوکات داوای دەست لەکارکێشانەوەی وەزیری تەندروستی دەکەن.
ئەمرۆ سێشەممە ٦ـی ئایارـی ٢٠٢٥، لە کۆنفرانسێکی ڕۆژنامەنوسیدا پزیشکانی نارازی هەولێر ئاماژەیان بەوەکرد، سەرەکیترین داواکارییەکانیان دامەزراندن و دەستپێکردنەوەی سیستمی پلەبەندییە، کە دەڵێن بەهۆی راگرتنی ئەو سیستەمەوە ژمارەیەکی زۆر لەپزیشکانی دامەزراو زەرەرمەند بوون.
هەروەها، داوا دەکەن وەزیری تەندروستی
حکومەتی کاربەڕێکەری هەرێم دەستلەکاربکێشێتەوە و ئەندامانی ئەنجومەنی سەندیکاکانی
پزیشکان بگۆڕێن و لەشوێنیان کەسانی بەهەڵوێست دابنرێن.
هاوکات، لەبارەی داواکارییەکانیانەوە
ئەوەیان خستەڕوو، لیژنەیەک لەناو ئەنجومەنی وەزیران بۆ چارەسەرکردنی گرفتەکانیان
پێکهێنراوە، بەڵام کارەکانی لیژنەکە تا ئێستا هیچ ئەنجامێکی نییە.
ئەمە لەکاتێکدایە، ژمارەی
پزیشکانی دانەمەزراو لە هەولێر ٧٧٨ پزیشکە، پێشتریش چەندین جار پزیشکانی نارازی خۆپیشاندانیان ئەنجامداوە و دەلێن تا حکومەتی کاربەڕێکەر بەدەم داواکانیانەوە نەچێت بەردەوام دەبن لەدەربڕینی ناڕەزایەتی.
