PM:01:41:05/05/2025
1248 جار خوێندراوەتەوە
كۆمسیۆنی باڵای سەربەخۆی هەڵبژاردنەكانی عێراق رایگەیاند، بەكارهێنانی هەر جۆرە تەكنەلۆژیایەكی زیرەکی دەستكرد (AI) لەكاری ئامێرەكانی هەڵبژاردن لە رۆژی دەنگدان رەتدەكەنەوە. ئەوەش دوای ئەوەی ئەندامێکی تیمی میدیایی کۆمسیۆن رایگەیاند، کۆمسیۆنی هەڵبژاردنەکان به‌كارهێنانی زیرەکی دەستکرد پەسەند دەکات.
ئەمڕۆ دووشەممە ٥ی ئایاری ٢٠٢٥، كۆمسیۆنی باڵای سەربەخۆی هەڵبژاردنەكانی عێراق بڵاویكردەوە، ئەو هەواڵانە رەتدەکەنەوە کە لە میدیاکاندا بڵاوبونەتەوە سەبارەت بە بەکارهێنانی هەر جۆرە تەکنەلۆژیایەکی زیرەکی دەستکرد لە کارپێکردنی ئامێرەکانی هەڵبژاردن لە رۆژی هەڵبژاردندا.
لە دوای
ئەوەی، ئەمڕۆ حەسەن هادی زایر،ئەندامی تیمی میدیایی کۆمسیۆنی باڵای سەربەخۆی
هەڵبژاردنەکانی عێراق رایگەیاند، ئامێری راگه‌یاندنی ئەنجامەکان چەندین
تەکنەلۆژیای زیرەکی دەستکرد لەخۆدەگرێت، بە هەنگاوێک کاردەکات کە وای لێدەکات پشتی
مۆر و لیبێڵی کاغەزەکە بناسێتەوە و جیاوازی بکات لە نێوان کاغەزەکانی نادروست و
مۆرنەکراو.
ئاماژه‌ی
به‌وه‌شكرد، هەموو ئەو رێوشوێنانە ئامانجیان نەهێشتنی ساختەکارییە و بە
شەفافیەتێکی بەرز لەبەردەم هاوبەشەکانی پرۆسەی سیاسیدا کاردەکەن، لەوانەش
دەنگدەران، کاندیدەکان، میدیاکان و رێکخراوەکانی کۆمەڵگەی مەدەنی.
ئەوەش لە کاتێکدایە، بڕیارە
لە ١١ـی تشرینی دووەمی ئەمساڵ هه‌ڵبژاردنی په‌رله‌مانی عێراق به‌ڕێوه‌بچێت و له
ئێستادا لایه‌نه سیاسیه‌كان ئاماده‌كاریه‌كان بۆ هه‌ڵبژاردنه‌كه ده‌ستپێكردوه و
كۆمسیۆنیش ده‌ڵێت، ئاماده‌یه بۆ ئه‌وه‌ی هه‌ڵبژاردن له واده‌ی خۆیدا به‌ڕێوه‌ببات.
