PM:05:23:04/05/2025
1780 جار خوێندراوەتەوە
ئاسایشی عێراق رایگەیاند، لە كەركوك مەترسیدارترین كەسیان دەستگیركردووە كە لەڕێگەی تۆڕە كۆمەڵایەتییەكانەوە هەڕەشەی لە هاوڵاتیانی شارەكە كردووە.
ئەمڕۆ یەکشەممە ٤ـی ئایاری ٢٠٢٥، لە راگەیەندراوێكدا، ئاسایشی عێراق بڵاویكردەوە، لەسەر زانیاری ورد هێزەكانیان توانیویانە لەشاری كەركوك یەكێك لە مەترسدارترین ئەو كەسانە دەستگیر بكات كە جێگەی مەترسی بوون بۆ هاوڵاتیانی شارەكە و لە رێگەی پلاتفۆڕمە جیاوازەكانی سوشیاڵ میدیاوە هەڕشەی لە خەڵك كردووە.
ئاماژە
بەوەشکراوە، لە لێكۆڵینەوە سەرەتاییەكاندا دەركەوتووە كە تۆمەتبارەکە لەرێگەی
پەیجەكانییەوە سەرجەم چین و توێژە جیاوازەکانی کۆمەڵگەی عێراقی لە هاوڵاتییان،
فەرمانبەرانی حکومەت، دادگای تێهەڵچوونەوەی کەرکوک و چەندین سەرکردەی ئەمنی و
ئەندامی پەرلەمان و ئەکادیمی و پزیشکی بە هەردوو رەگەزی نێر و مێ، بە ئامانج گرتووە.
هاوکات ئاسایشی
عێراق، داوا لە ئەو هاوڵاتییانە دەكات كە لەرێگەی پەیجەكانەوە هەڕەشەیان لێکراوە،
سەردانی لایەنە پەیوەندیدارەكان بكەن و سکاڵا لەسەر تۆمەتبارەكە تۆمار بكەن، بۆ
ئەوەی بتوانن رێکاری یاسایی بەرامبەری بگرنەبەر.
