دکتۆر پینگ ژۆو، نووسەری سەرەکی توێژینەوەکە لە زانکۆی پزیشکی ئەنهوی لە چین دەڵێت: "ئەم توێژینەوەیە تیشک دەخاتە سەر پێویستی بەڕێوەبردنی تەندروستی خەو لە کاتی دووگیانیدا، پەیوەندییەکی راستەوانە هەیە لە نێوان خەوی دایکان لە کاتی دووگیانیدا و گەشەکردنی دەمارەکان لە منداڵاندا".

توێژەران داتای خەوتنیان لە حەوت هەزار و ٥٩ جووت دایک و منداڵ لە سێ نەخۆشخانەی جیاواز لە چین شیکردەوە.

ئەوان پشکنینی دواکەوتنی گەشەکردنی منداڵەکانیان کرد لە تەمەنی شەش مانگەوە تا سێ ساڵ و پەیوەندی نێوان ماوەی خەوی دایکان و مەترسی دواکەوتنی گەشەکردنی دەمارەکانیان شیکردەوە، هەروەها رۆڵی ئاستی پێپتیدی سییان لە سیرۆمی خوێنی پەنجەی مێشکدا هەڵسەنگاند، کە نیشاندەرێکی بەردەوامە بۆ دەردانی ئەنسۆلینی کۆرپەلە.

توێژینەوەکە گەیشتە ئەو ئەنجامەی کەمخەوی لە کاتی دووگیانیدا رەنگە پەیوەندی هەبێت بە زیادبوونی مەترسی تووشبوون بە کێشەکانی گەشەکردنی دەمارەکان لە منداڵاندا، کە کاریگەری لەسەر توانای هزری و گەشەکردنی رەفتار و توانای فێربوونیان دەبێت.

بە وتەی توێژەران، پێدەچێت کوڕان مەترسی زیاتریان لەسەر بێت بۆ دواکەوتنی گەشەکردنی دەمارەکان کاتێک دایکیان بەدەست تێکچوونی خەوەوە دەناڵێنێت لە کاتی دووگیانیدا، ئەمەش ئەوە پیشان دەدات کە خەو رۆڵێکی گرنگی هەیە لە وەڵامدانەوەی نەوەکان بۆ هۆکارە ژینگەییەکان پێش لەدایکبوون.

توێژەران ئاماژە بەوەش دەکەن، تێکچوونی خەو لە کاتی دووگیانیدا رەنگە کاریگەری لەسەر میتابۆلیزمی گلوکۆزی دایک هەبێت و بەمجۆرە کاریگەری لەسەر ژینگەی گەشەی کۆرپەلە هەبێت.

لەکۆتاییدا نووسەری سەرەکی توێژینەوەکە دەڵێت، "تەندروستی پێش لەدایکبوون نەک تەنها بۆ دایکی دووگیان بەڵکو بۆ تەندروستی درێژخایەنی منداڵەکەش گرنگە".