پاش ئەوەی لیژنەی دارایی لە پەرلەمانی عێراق یەکەم گفتوگۆی لەسەر بودجەی ئەمساڵ کرد، پشکی هەرێم لە بودجەدا بە زیاتر لە ٢٠ ترلیۆن و ٩١٠ ملیار دینار دیاری کرا، کە ئەوەش بەراورد بە بودجەی ٢٠٢٣، چوار ترلیۆن و ٥٠٠ دینار زیادی کردووە، لەو بڕەش ١١ ترلیۆن و ٥٧٦ ملیار دیناری بۆ مووچەى فەرمانبەرانى هەرێم دیاریکراوە، واتە بۆ هەر مانگێک ٩٦٤ ملیار دینار دەکات.

بەمەش گەر هەرێم پابەندی بڕیارەکانی دادگای فیدراڵی بێت بۆ رادەستکردنی داهاتی نانەوتی و بەبانیکردنی مووچەی مووچەخۆرانی، ئەوا شایستەکانی فەرمانبەران گەرەنتی کراوە و هەموو مانگێک لە وادەی خۆیدا پێیان دەدرێت.

هاوکات لەو ١١ ترلیۆنەی بۆ مووچەی مووچەخۆرانی هەرێم دیاریکراوە، بەغدا تا ئێستا زیاتر لە سێ ترلیۆن و ١٣٠ ملیار دیناری ناردووە، کە مووچەی چوار مانگی رابردووی مووچەخۆرانی هەرێمە، بەمەش کۆی بڕی ئەو پارەیەی بۆ مووچەی مووچەخۆرانی هەرێم ماوە هەشت ترلیۆن و ٤٤٦ ملیار دینارە کە بۆ مووچەی هەشت مانگی داهاتوو دابینکراوە.

لەلایەکی دیکەوە لە بەشە بودجەی هەرێمدا سێ ترلیۆن و ٢٦٤ ملیار دینار بۆ خەرجییەکانی حکومەت دابینکراوە، چوار ترلیۆن و ٩٥٤ ملیار دیناریش بۆ خەرجی وەبەرهێنان دانراوە، لەگەڵ گەڕانەوە بڕی یەک ترلیۆن و ١١٦ ملیار دینار قەرز بۆ هەر سێ بانکى تى بی ئاى، رافیدەین و رەشید کە لە ساڵی رابردوودا بە هەرێمیان دابوو، کە بڕەکەی دوو ترلیۆن و ١٠٠ ملیار دینار بوو، بەگوێرەى بڕیارى حکومەتى عێراق ئەو قەرزە لە پشکى بودجەى ٢٠٢٤ـی هەرێمى کوردستان دەبڕدرێت.