PM:01:49:21/04/2024
788 جار خوێندراوەتەوە
وەزیری دارایی عێراق رایگەیاند، لەڕێگەی فراوانکردنی بنەماکانی باج و بەئەلکترۆنیکردنی مامەڵەکان و بەرزکردنەوەی کارامەیی گومرگیی، کار دەکەین بۆ باشترکردنی پلانەکانی تایبەت بە جێبەجێکردنی بودجەی گشتی، کەمکردنەوەی خەرجییە گشتییەکان و زیادکردنی داهاتی نانەوتی.
ئەمڕۆ یەکشەممە، لە کۆبوونەوەی سندوقی دراوی نێودەوڵەتی و گروپی بانکی نێودەوڵەتی، تەیف سامی وەزیری دارایی عێراق لەگەڵ عەبدولعەزیز مەولا بەڕێوەبەری جێبەجێکاری بانکی نێودەوڵەتی بۆ کاروباری عێراق کۆبووەوە و گفتوگۆ لەبارەی پاڵپشتییەکانی بانکی نێودەوڵەتی بۆ عێراق کرا.
وەزیری دارایی ئاماژەی بەوەش کرد، لە کۆبوونەوەی لەگەڵ بەڕێوەبەری
بەشی کاروباری دارایی و تەکنیکی سندوقی دراوی نێودەوڵەتی گفتوگۆیان لەبارەی رێوشوێنەکانی
چاکسازیکردن لە دۆسیەی باج و گومرگی عێراق کردووە، هەوڵەکانیشیان بۆ کارکردن لەسەر
سیستەمێکی دارایی پتەو بەردەوام دەبێت.
لای خۆشییەوە، عوسمان دەوانی جێگری سەرۆکی نوێی بانکی نێودەوڵەتی
ئامادەیی خۆی بۆ پاڵپشتیکردنی پڕۆژەکانی عێراق لە بوارەکانی دارایی و ئابووری
دووپاتکردەوە، بەتایبەت دابینکردنی پێداویستییەکان بۆ جێبەجێکردنی پڕۆژەی هێڵی
ئاسنین کە بە یەکێک لە گرنگترین پڕۆژەکانی گواستنەوەی ناوچەیی و نێودەوڵەتی دادەنرێت.
