وەزارەتى گواستنەوە و گەیاندنى عێراق رایگەیاند، گەشتى راستەوخۆ لە نێوان فڕۆکەخانەکانى بەغدا و بەسرە لەگەڵ چین دەست پێدەکاتەوە و هەفتانە دووجار ئەو گەشتە دەکرێت.
ئەمڕۆ دووشەممە، وەزارەتى گواستنەوەى عێراق لە راگەیەندراوێکدا ئاماژەى بەوەکردووە، بەپێى رێککەوتنى نێوان هێڵى ئاسمانى عێراق و لایەنى چینى بڕیارە رۆژانى شەممە و سێ شەممە گەشت لە فڕۆکەخانەکانى بەغدا و بەسرە لە عێراقەوە بۆ چین بکرێن.
باسی لەوەش کردووە، لە رۆژانى یەک شەممە و چوارشەمەمەدا بە راستەوخۆ لە فڕۆکەخانەى
داشینخەوە بۆ فڕۆکەخانەکانی چین گەشت دەکرێت.
دەستپێکردنەوەى گەشتى راستەوخۆى نێوان عێراق و چین لەکاتێکدا رۆژانە سەدان
بازرگان و هاوڵاتى عێراقى سەردانى چین دەکەن و بە رێگاى ناڕاستەوخۆ سەفەر دەکەن و
ئەوەش خەرجى زیاترى لەسەر ئەو کەسانە دروستکردووە.
ماوەى نزیکەى چوار ساڵە گەشتى راستەوخۆ لە نێوان عێراق و چیندا بچڕاوە و
بە دەستپێکردنەوەى گەشتى راستەوخۆى عێراق و چین، پێدەچێت گەشتى راستەوخۆ بۆ چەندین
وڵاتى دیکەش بکرێتەوە.