وەزارەتی کشتوکاڵی عێراق رایگەیاند، بە مەبەستی دابەزاندنی نرخی گۆشتی سور لە بازاڕەکاندا هاوردەکردنی گوێرەکە بۆ ناوخۆی عێراق بەردەوام دەبێت. دەشڵێت، دوێنێ ١٩ هەزار سەر گوێرەکەیان هاوردە کردووە کە بەسە بۆ دابەزینی نرخی گۆشت لە رەمەزاندا.
ئەمڕۆ پێنجشەممە، وەزارەتی کشتوکاڵی عێراق رایگەیاند، بۆ ئەوەی نرخی گۆشتی سور لە بازاڕەکانی عێراقدا جێگیر بکەن بەردەوام دەبن لە هاوردەکردنی گوێرەکە .
ئاماژەی بەوەش کردووە، دوێنێ ١٩ هەزار سەر گوێرەکەیان لە بەرازیلەوە هاوردەی عێراق کردووە و وەزارەتەکەیان بە هاوکاری نەخۆشخانەی
ڤێتێرنەری بەسرە و بنکەی ڤێتێرنەری لە بەندەری ئوم قەسر، لیژنەیەکیان پێکهێناوە بۆ
پشکنینی گوێرەکەکان و دواتر بەسەر پارێزگا جیاوازەکاندا دابەش دەکرێن.
جەختیشی لەوە کردووەتەوە، گەیشتنی ئەم گوێرەکانە چەند رۆژێک پێش مانگی
رەمەزانی پیرۆز، بەسە بۆ کەمکردنەوەی نرخی گۆشت لە بازاڕەکاندا.
ئەمەش دوای ئەوە دێت، لە ماوەکانی رابردوودا وەزارەتی کشتوکاڵی عێراق
رایگەیاند، دەستدەکەن بە هاوردەکردنی ئاژەڵ لە وڵاتانی دەرەوە بۆ ئەوەی نرخی گۆشتی
سور داببەزێنن.