کونسوڵی گشتی چین لە هەرێم رایگەیاند، لەسەرەتای مانگی داهاتووەوە و کونسوڵخانەی چین راستەوخۆ ڤیزای وڵاتەکەی دەدات بە هاوڵاتیانی هەرێم.
ئەمڕۆ چوارشەممە، لوو جوون، کونسوڵی گشتی چین لە هەرێمی کوردستان لە کۆنفڕانسێکی رۆژنامەنووسیدا باسی لەوەکرد، لە مانگی داهاتووەوە هاوڵاتیانی هەرێم دەتوانن راستەوخۆ داوای ڤیزای چین بکەن.
باسی لەوەش کرد، لەمەودوا هاوڵاتیان ناچارنابن بچنە بەغدا و تورکیا بۆ وەرگرتنی
ڤیزای چین و دەتوانن لە هەولێر ڤیزاکە وەربگرن.
پێشتر، کونسوڵخانەی چین لە هەرێم لە راگەیەندراوێکدا بڵاویکردەوە، حکومەتی
چین بڕیاریداوە ڤیزای وڵاتەکەی بەشێوەی راستەوخۆ بداتە هاوڵاتیانی هەرێم و بەپێی بڕیارەکەش
هاوڵاتیان دەتوانن بەشێوەی ئۆنلاین ڤیزاکانیان وەربگرن و بڕیارەکە تەنها هەرێم دەگرێتەوە
و پارێزگاکانی دیکەی عێراق ناگرێتەوە.
هاوکات، ئەمەش لە کاتێکدایە، بەڕێوەبەری کۆمپانیایەکی گەشتکردن لە هەرێمی
کوردستان بە ئێن ئاڕتی راگەیاند، پرۆسەی پێشکەشکردنی ڤیزا بەشێوەی ئۆنڵاین بە چەند
قۆناغێک جێبەجێ دەکرێت، کە ئەو کەسەی خواستی وەرگرتنی ڤیزای هەبێت دەبێت بچێتە پەڕەی
فەرمی ئەو وڵاتەی کە دەیەوێت گەشتی بۆ بکات دواتر لینکی تایبەت بە ڤیزا وڵاتەکە
بکاتەوە و فۆڕمێکە پڕبکاتەوە .