لایخۆشییەوە گروپی چەکداری عزەدین قەسام سەر بە گروپی حەماس رایگەیاند، لە کاتژمێر ٧ـی بەیانییەوە سەرجەم کردەوە چەکدارییەکانیان لە غەززە راگرتووە.

لەبارەی ئازادکردنی دیلەکانیشەوە باسی لەوە کردووە، لە ماوەی چوار رۆژدا ئامادەن ٥٠ دیلی ئیسرائیلی ئازادبکەن کە سەرجەمیان ژن و منداڵن و بەرامبەر هەر یەکێکیشیان ئیسرائیل دەبێت سێ دیلی فەڵەستین ئازادبکات.

هاوکات، نوسینگەی بینیامین ناتانیاهۆ سەرۆک وەزیرانی ئیسرائیل بڵاویکردەوە، چاودێری ئاگربەستەکە و ئازادکردنی دیلە ئیسرائیلییەکان دەکەن و لەگەڵ کەسوکاری دیلەکاندا لە پەیوەندیدان.

شەوی رابردوو پێش دەستپێکردنی ئاگربەستەکە، ئاژانسی هەواڵی فەڵەستین بڵاویکردەوە، لە ئەنجامی بۆردوومانی سوپای ئیسرائیل بۆ سەر قوتابخانەی ئەبو حوسێن کە ژمارەیەک ئاوارەی تێدا نیشتەجێیە ٢٧ کەس گیانیان لەدەستداوە و ٩٣ کەسیش برینداربوون.

بەپێی دوایین ئامارەکان، لە سەرەتای جەنگی نێوان حەماس و ئیسرائیلەوە تاوەکو ئێستا ١٤ هەزار و ٨٥٤ کەس لە کەرتی غەززە گیانیان لەدەستداوە کە زیاتر لە شەش هەزار و ١٥٠ کەسیان منداڵن و نزیکەی چوار هەزاریشیان ژنن.

ئەمە لە کاتێکدایە، جەنگی حەماس و ئیسرائیل لە ٧ـی مانگی رابردووەوە بەردەوامە و لە دوای دەستپێکردنی هێرشەکانی حەماسەوە، سوپای ئیسرائیل بەردەوامە لە بۆردوومانکردنی کەرتی غەززە و گەمارۆی شارەکەی داوە.