بەگوێرەی پێنوێنی بۆرسەی جیهانی یەک بەرمیل نەوتی خاوی برێنت بە ٨٢ دۆلار و ٧٥ سەنت مامەڵەی پێوەدەکرێت و بەراورد بە دوێنێ نرخەکەی دوو دۆلار و پێنج سەنت نزمبووەتەوە.
ئەمڕۆ چوارشەممە، نرخی یەک بەرمیل نەوتی خاوی ئەمریکی (تێکساس) بە ٧٨ دۆلار و ٥٠ سەنتە و بەراورد بە دوێنێ سێشەممە دوو حەوت سەنت نزمبووەتەوە.
لە مانگی رابردوودا سعودیە رایگەیاند، لەگەڵ روسیا تاوەکو
کۆتایی مانگی کانوونی دووەمی داهاتوو بەردەوام دەبن لە کەمکردنەوەی خۆبەخشانەی بەرهەمهێنانی
نەوت و بەپێی بڕیارەکەش سعودییە رۆژانە تەنها نۆ ملیۆن بەرمیل نەوت بەرهەمدەهێنێت.
لەو بارەیەوە، رێکخراوی ئۆپیک رایگەیاند، کەمکردنەوەی بەرهەمهێنانی
نەوت لەلایەن سعودییە و روسیاوە دەبێتە هۆی کەمبوونەوەی دابینکردنی رێژەی پێویستی
نەوت لە جیهاندا تا کۆتایی ئەمساڵ.
لایخۆشیەوە، عەلی مەشکور، ئەندامی لیژنەی نەوت و غاز لە
پەرلەمانی عێراق بە ئێن ئاڕ تی راگەیاند، ناکۆکییەکانی نێوان حەماس و ئیسرائیل کاریگەری
لەسەر نرخی نەوت و بازاڕەکانی ئەو وزەیە دروستکردووە و هەر بەرزبوونەوەیەک لە نرخی
نەوتدا کورتهێنانی بودجەی عێراق کەمدەکاتەوە.
ئەمەش لە کاتێكدایە، وەزارەتی نەوتی عێراق رایگەیاند، زیادکردنی
بەرهەمهێنان و هەناردەکردنی نەوتی عێراق کاریگەری لەسەر بڕیارەکەی ئۆپیک پڵەس
ناکات و بۆ سەقامگیری بازاڕی نەوت و جیهان پابەندی بڕیارەکان دەبن.