ئەمڕۆ شەممە کۆنفرانسی "لوتکەی قاهیرە بۆ ئاشتی " لە شاری قاهیرەی پایتەختی میسڕ بەڕێوەچوو، لە میانەی کۆنفڕانسەکەدا چەندین سەرۆک و سەرکردەی وڵاتە عەرەبی و ئەوروپییەکان و بەشێک لە ڕێکخراوەکانی مافی مرۆڤ گفتوگۆیان سەبارەت بە ناکۆکییەکانی نێوان ئیسرائیل و فەڵەستین کرد و باسیان لە گرنگی ئاگربەست و رێککەوتنی ئەو دوو وڵاتە کرد.
لە میانەی کۆنفرانسەکەدا محەمەد بن زاید نەهیان، سەرۆکی ئیمارات رایگەیاند، وڵاتەکەی کاردەکات بۆ ئاگربەستێکی دەستبەجێ و دابینکردنی پارێزگاری بۆ خەڵکی مەدەنی، و دەستەبەرکردنی ڕێڕەوی مرۆیی سەلامەت بۆ ناردنی هاوکاری بۆ کەرتی غەززە.
لای خۆشیەوە، ئانالینا بایربۆک وەزیری دەرەوەی ئەڵمانیا سەبارەت بە هەڵوێستەکانی
ئاماژەی بەوەکرد، "ئامانجی حەماس ئەوەیە کە ببێتە هۆی پەرەسەندنی زیاتری ناکۆکییە
ناوچەییەکان و ئەمەش قبووڵنەکراوە، بەلام دایکان و باوکانی فەلەستینی لە غەززە کە
بۆ دابینکردنی بژێوی بۆ ڕۆڵەکانیان دەجەنگن، بە زمانی تیرۆر قسە ناکەن و پێویستە لە
میانەی ئەو جەنگەدا ئەوان پارێزراو بن و نەکرێنە ئامانج".
هاوکات، حەمەد بن عیسا پاشای بەحرەین، جەختی لە پشتیوانی وڵاتەکەی بۆ دامەزراندنی
دەوڵەتی سەربەخۆی فەڵەستین کردەوە و رایگەیاند، گفتووگۆ و رێککەوتن چارەسەری
هەمیشەیی ناکۆکییەکان دەکات.
مەحمود عەباس سەرۆکی دەسەڵاتی نیشتمانی فەڵەستین، لە وتارەکەیدا وتی:"ئاوارەبوون
قبوڵ ناکەین و لەسەر خاکی خۆمان بە چەسپاوی دەمێنینەوە".
محەمەد شیاع سودانی سەرۆک وەزیرانی عێراق، لە وتارەکەیدا
ئاماژەی بەوەکرد، بە ئامانجکردنی خەڵکی مەدەنی لە کۆمەڵگە نیشتەجێبوونەکان و کڵێسا
و نەخۆشخانەکاندا ئەوە دەردەخات کە ئیسرائیل سەرجەم هێڵە سوورەکانی بەزاندووە و گەلی
فەڵەستین ڕووبەڕووی جینۆساید بوونەتەوە.
لە ٧ـی ئەم مانگە گروپی چەکداری حەماس
هیرشیکردە سەر شارە ئیسرائیلییەکان و بەهۆیەوە تاوەکە ئێستا نزیکەی پێنج هەزار
هاووڵاتی لە هەردوولا گیانیان لەدەستداوە و هەزارەها فەڵەستینی ئاوارەبوون و
چەندان ئیسرائیلی بەبارمتە گیراون.