بەرپرسێکی حکومەتی فەڵەستین رایگەیاند، پاش بۆردوومانکردنی نەخۆشخانەی ئەلمعەمدانییە لە غەززە و گیانلەدەستدانی زیاتر لە ٥٠٠ کەس سەرۆکی فەڵەستین کۆبوونەوەکەی لەگەڵ سەرۆکی ئەمریکادا دواخستووە و بریاریداوە بگەڕێتەوە بۆ رامەڵا.
ئەمڕۆ سێشەممە، سوپای ئیسرائیل بۆردومانی نەخۆشخانەی ئەلمعەمدانییەی لە غەززە کرد و بەهۆیەوە زیاتر لە ٥٠٠ کەس گیانیان لەدەستدا و میدیا عەرەبییەکان لە زاری بەرپرسێکی باڵای فەڵەستینەوە بڵاویانکردووتەوە مەحمود عەباس سەرۆکی فەڵەستین کۆبوونەوەکەی لەگەڵ جۆ بایدن سەرۆکی ئەمریکا لە ئوردون دواخستووە و گەڕاوەتەوە فەڵەستین.
وتەبێژی تەندروستی غەززە لە راگەیاندراوێکدا بڵاویکردەوە
ئیسرائیل نەخۆشخانەی مەعمەدانی لە کەرتی غەززە بۆردوومانکردووە و بەهۆیەوە زیاتر لە
٥٠٠ کەس گیانیان لەدەستدا و نزیکەی ٣٠٠ کەسیش بریندار بوون و سەدان کەسیش لەژێر
داروپەردووی نەخۆشخانەکەدا ماونەتەوە.
پێشتریش، نووسینگەی
راگەیاندنی حەماس لە غەززە رایگەیاند، ژمارەی ئەو منداڵانەی لە ئەنجامی هێرشەکانی
ئیسرائیل بۆ سەر کەرتی غەززە لە ٧ی تشرینی یەکەمەوە کوژراون بۆ ٩٤٠ منداڵ و ژنانیش
بۆ زیاتر لە هەزار کەس بەرزبووەتەوە و بە گشتی لە غەززە سێ هەزار کەس گیانیان لەدەستداوە
و ١٢ هەزار و ٥٠٠ کەسیش بریندار بوون .
لە بەرەبەیانی
٧ـی تشرینی یەکەمی ئەمساڵ گروپی چەکداری حەماس هەزاران موشەکی ئاڕاستەی ئاسمانی ئیسرائیل
کرد و سەدان چەکداری چووە شارە ئیسرائیلییەکانەوە و گرژی و ئاڵۆزییە چەکدارییەکانی
نێوانیان تا ئێستاش بەردەوامی هەیە.