AM:11:44:07/10/2023
4260 جار خوێندراوەتەوە
گروپە چەکدارەکانى فەڵەستین رایانگەیاند، هەزاران موشەکییان لە کەرتى غەزەوە ئاراستەى ئیسرائیل کردووە و دەیان چەکدارایشیان دزەیان کردووەتە ناو خاکى ئیسرائیل، بەهۆی هێرشەکانیشەوە ٢٢ کەس گیانیان لەدەست داوە، سەرۆک وەزیرانی ئیسرائیلیش دەڵێت،" ئێمە لە حاڵەتی جەنگداین و بە توندی وەڵامیان دەدەینەوە".
ئەمڕۆ شەممە، گروپە چەکدارەکانی فەڵەستین رایانگەیاند، بەرەبەیانى ئەمڕۆ گروپە چەکدارەکانى کەرتى غەزە لە ماوەیەکى کەمدا زیاتر لە پێنج هەزار موشەکیان ئاراستەى ناوچەکانى باشوور و ناوەڕاستى ئیسرائیل کردووە، بەهۆی هێرشەکانیشەوە، بەرپرسێکی ئیسرائیلی و شەش کەسی دیکە کوژراون و سەدان کەسی دیکەش برینداربوون، سەرۆک وەزیرانی ئەو وڵاتەش دەڵێت، بە توندی وەڵامی هێرشەکان دەدەنەوە.
بە بڕوای چاودێرانیش،
ئەم هێرشە گەورەترین
خزمەتە بە باڵی راسترەو و توندرەوی ئیسرائیل بە سەرۆکایەتی بینیامین نەتانیاهۆ و
هاوپەیمانەکانی، بەوپێیەی ناتانیاهۆ یەکێکە لە کەسایەتییە توندەکان بەرامبەر عەرەب
و موسوڵمانان و گوتاری توندی هەیە ، دەیەوێت گۆرانکاری بکات لە سیستەمی دادوەری و
کار بۆ هەندێک رێکاری تر خۆش بکات کە دەسەڵاتی خۆی زیاد بێت و لێپێچینەوە لێی کەمتر
بێت.
هاوکات لەگەڵ هێرشە موشەکییەکاندا، دەیان چەکدار دزەیانکردووەتە ناو
خاکى ئیسرائیل و دەنگی
تەقینەوە لە دەوروبەری تەلئەبیب و قودسیش بیستراوە، لەگەڵ پێشڕەوی چەکدارانی فەڵەستین، سوپای ئیسرائیل دەستی کردووە بە چۆڵکردنی بەشێک لە بنکە ئاسمانییەکانی.
لاى خۆیەوە یۆڤ
گاڵانت، وەزیری بەرگریی ئیسرائیل باسی لەوەکرد، بزوتنەوەى حەماسى فەڵەستینى
هەڵەیەکی گەورەی کردوە و جەنگی لە دژی ئیسرائیل راگەیاندووە.
ئەوەشی خستەڕوو،
حکومەتى ئەمنى ئیسرائیل کۆبوونەوەى بەپەلە لەسەر هێرشەکان دەکات و وەڵامى هێرشە
موشەکییەکان دەداتەوە.
ئەمەش لە کاتێکدایە، چەندین ساڵە شەڕ و رووبەرووبوونەوە لەنێوان گروپە چەکدارەکانی فەڵەستین و سوپای ئیسرائیلدا بەردەوامە، تا ئێستاش بەوهۆیەوە بە سەدان کەس گیانیان لەدەست داوە و هەزارانی دیکەش برینداربوون.
