ئاماژەی بەوەشکرد، ئەو ماددانەی دیکە گفتوگۆیان لەسەر کراوە لە ئێستادا دانیشتنی پەرلەمانی عێراق لەسەر پرۆژە یاسای بە پارێزگابوونی هەڵەبجە لە نێو هۆڵی پەرلەماندان.

ئەوەشی خستەڕوو، ئەگەر هیچ تێبینییەک ناڕەزاییەک لەلایەن هیچ لایەنێکەوە نەبێت ئەوا ئەمڕۆ دەنگدانی لەسەر دەکرێت و ئەگەر دەنگی زۆر بهێنێت ئەوا ئەمڕۆ هەڵەبجە دەکرێت بە ١٩هەمین پارێزگای عێراق.

رۆژی دووشەممەی رابردوو، پەرلەمانی عێراق بۆ دەنگدان لەسەر بەپارێزگاکردنی هەڵەبجە کۆبووەوە بەڵام پرۆژە یاساکە دواخرا بۆ رۆژی سێشەممە چونکە ژمارەیەک لە پەرلەمانتارانی دەوڵەتی یاساش داوایان دەکرد لەگەڵ هەڵەبجەدا تەلەعفەریش بە پارێزگا بکرێت.

لە رێکەوتی ١٣ی مانگی ئازاری ئەمساڵ لە نوسراوێکدا کە فڕاکسیۆنی نەوەی نوێ لە پەرلەمانی عێراق ئاڕاستەی ئەنجومەنی وەزیرانی کردووە هاتووە، وەزارەتی پلاندانان رێکارەکانی بە پارێزگابوونی هەڵەبجەی پەسەندکردووە و وەک پارێزگایەکی سەربەخۆ مامەڵەی لەگەڵدا دەکات و زنجیرەی ژمارە ١٦ـی پێدراوە.

دواتریش لە ٢ـی نیساندا یەکەم خوێندنەوە بۆ بەپارێزگاکردنی هەڵەبجە ئەنجامدرا و رۆژی پێنجشەممەش دەنگی لەسەر دەدەن.

رەشنووسی پڕۆژەیاسای بەپارێزگاکردنی هەڵەبجە لەم ماددانە پێکهاتووە:

ماددەی یەکەم: شاری هەڵەبجە لە هەرێمی کوردستان دەکرێتە پارێزگا و دەبێتە ١٩هەمین پارێزگای کۆماری عێراق و ناوەندی پارێزگاکەش شاری هەڵەبجە دەبێت.

ماددەی دووەم: لەسەر ئەنجوومەنی وەزیرانی هەرێم پێویستە سنووری یەکە ئیدارییەکانی پارێزگای هەڵەبجە دیاریبکات.

ماددەی سێیەم: لەسەر لایەنە پەیوەندیدارەکان پێویستە بڕگەکانی ئەم پڕۆژەیاسایە جێبەجێبکەن.

ماددەی چوارەم: ئەم پڕۆژە یاسایە لە رێکەوتی دەرچوونی لە رۆژنامەی سەباحی فەرمی جێبەجێدەکرێت.

گۆران عەبدوڵا-بەغدا