ئەنجومەنی وەزیرانی عێراق لە ٣٩هەمین دانیشتنی ئاساییدا بڕیاریدا ، هەموو مامەڵە و گرێبەستە بازرگانییەکان کە لە ناوخۆی عێراق ئەنجام دەدرێن لەمەودوا بە دیناری عێراقی ئەنجام دەدرێن لە بری دۆلاری ئەمریکی.
رۆژی سێشەممە، محەمەد شیاع سودانی سەرۆک وەزیرانی عێراق سەرۆکایەتی ٣٩هەمین دانیشتنی ئەنجومەنی وەزیرانی کرد و تێدا بریاردرا، هەموو گرێبەستێکی بازرگانی کە لە عێراقدا ئەنجامدەدرێت بە دیناری عێراقی بکرێت جگە لەو گرێبەستانەی قەرزی دەرەکییان تێدایە.
ئاماژە بەوەشکرا، ئەو کەسانەی
لە بانکە حکومییەکان بە بانکی بازرگانی عیراقیشەوە بە دۆلار بە قەرزیان وەرگرتووە
دەتوانن قەرزەکانیان بە نرخی ١٣٢ هەزار دینار بۆ هەر ١٠٠ دۆلارێک بگەڕێننەوە.
ئەوەش خراوەتەڕوو، بانکی
ناوەندی ئەو قەرزانە بە دۆلار وەردەگرێتەوە و دەدرێتەوە ئەو بانکانەی ئەو قەرزانەیان
داوە و ئەم رێکارە تەنها ئەو قەرزانە دەگرێتەوە کە پێش ئەم بریارە کراون.
پێشتریش، عەلی عەلاق پارێزگاری
بانکی ناوەندی عێراق لە راگەیاندراوێکدا باسی لەوەکرد، لە چەند مانگی داهاتووەوە لە
مامەڵەی بازرگانی ناوخۆیی و مامەڵەی داراییدا لەبری دۆلار بە دیناری عێراقی بەکاردەهێندرێت.
ئەمەش لەدوای ئەوە دێت، لیژنەی
دارای پەرلەمانی عێراق رایگەیاند، لەماوەی سێ مانگی داهاتوودا نرخی دۆلار دەگەڕێتەوە
سەر نرخی فەرمی خۆی و بانکی ناوەندی لە ئێستادا لە ٪٨٠ـی پێداویستیەکانی دارایی
دابینکردووە.