مامۆستایەکی ناڕازی بە ئێن ئاڕ تی راگەیاند، ئەوان بە سێ مەرج دەست بە دەوام دەکەنەوە و حکومەتی کاربەڕێکەر هیچ مەرجێکی جێبەجێنەکردووە و دەرگای قوتابخانەکان ناکەنەوە. لێپرسراوی بەشی کارگێڕی راگەیاندنی کارمەندانی تەندروستی سلێمانیش دەڵێت، "هیچ وەڵامێکمان نەدراوەتەوە و داواکارییەکانمان جێبەجێنەکراون".
ئەمڕۆ سێشەممە، دیاری عەبدولقادر مامۆستای ناڕازی لە میانی بەشداریکردنی لە بەرنامەی تاوتوێی ئێن ئاڕتیدا باسی لەوەکرد، حکومەتی کاربەڕێکەر ناتوانێت لە ئاست بەرپرسیارێتی دابینکردنی بژێوی هاووڵاتیاندا بێت.
باسی لەوەشکرد، بەهۆی
سەرنەکەوتنی حکومەتی کاربەڕێکەری هەرێم لە دابینکردنی بژێوی هاوڵاتیان زۆرینەی ژیانی
پیشەیی مامۆستایەتییان لە راگرتنی دەوامدا بەسەربردووە.
ئەوەشی خستەڕوو، وەڵامەکانی
حکومەتی کاربەڕێکەر باوەڕپێکەر نییە و دابەشنەکردنی مووچە لەکاتی خۆیدا بێڕێزییە
بەرامبەر فەرمانبەرانی حکومەتی کاربەڕێکەر. دەشڵێت، "ئێمە ٣٣ مووچە خاتری دەسەڵاتمان
گرتووە و لەوەش زیاتر ناتوانین خاتریان بگرین".
لایخۆشییەوە، عیسا حسێن سەرۆکی
لقی هەولێری یەکێتی مامۆستایان باسی لەوەکرد، ئەوان وەک یەکێتی مامۆستایان
لقەکانیان سەرپشککردووە لە پاڵپشتیکردن لە راگرتنی دەوام و لەگەڵ مافەکانی
مامۆستادان، بەڵام بارودۆخ لە ناوچەیەکەوە و ناوچەیەک جیاوازە.
هاوکات، هەڤاڵ یاسین لێپرسراوی
بەشی کارگێڕی راگەیاندنی کارمەندانی تەندروستی سلێمانی ئەوەی خستەڕوو، ئەوان بە
چەند راگەیەندراوێک هۆشدارییان دا بە حکومەتی کاربەڕێکەری هەرێم و داواکارییەکانیان
تەنها موچە نییە و دەیانەوێت دوو مووچە
وەربگرن و پلەبەرزکردنەوە دەستپێبکاتەوە.
دەشڵێت، وەزیری تەندروستی و حکومەتی کاربەڕێکەر
بەرپرسن لە گیانلەدەستدانی ئەو دوو کەسەی بەهۆی نەبوونی پزیشکی پێویستەوە گیانیان
لەدەستدا.
هاوکات، عەلی رەئوف نوێنەری
وانەبێژان لە ئاکرێ باسی لەوەکرد، کێشەی ئەوان تەنها مووچە و شایستە داراییەکان
نییە بەڵکو دەیانەوێت دابمەزرێن بەڵام حکومەت هیچ گرنگی بە کەرتی پەروەردە نادات.