PM:02:22:23/09/2023
2740 جار خوێندراوەتەوە
ئەمینداری گشتی یەکگرتوو رایگەیاند، حکومەتی کاربەڕێکەری هەرێم لە خراپترین دۆخی هەستکردن بە بەرپرسیارێتیدایە. دەشڵێت، " دەسەڵات بێباکە بەرامبەر ماف و شایستەکانی فەرمانبەران بەگشتی و مامۆستایان بە تایبەتی".
رۆژی شەممە، سەڵاحەدین بەهادین ئەمینداری گشتی یەکگرتوو لە میانی بەشداریكردنی كۆنفرانسی گشتی سەرپەرشتیارانی پەروەردەیی یەكگرتوو ئەوەی خستەڕوو، حكومەتی کاربەڕێکەری هەرێم لە خراپترین دۆخی هەستكردن بە بەرپرسیارێتیدایە و ئەمەش كاریگەری زۆری لەسەر پرۆسەی پەروەردە و فێركردن لە هەرێمی كوردستان كردووە.
باسی لەوەشکرد، حكومەتی کاربەڕێکەری هەرێم جگە لە شكستهێنانی لە پرسی دیبلۆماسی
و گفتوگۆكاندا لە بواری پەروەردەشدا گەورەترین شكستی هێناوە و هەست بەوەناکات پێشكەوتنی
هەر گەل و نەتەوەیەک بەندە بە پەروەردە و فێركردنەوە و كە لە هەرێم فەرامۆش كراوە.
ئاماژەی بەوەشکرد، "نەوەكانمان لە هەركات زیاتر پێویستییان بە پەروەردە
و فێركردنە لە قۆناغی باخچە تاوەكو زانكۆ و جێگەی نیگەرانیمانە كە دەسەڵات زۆر بێباكە
بەرامبەر ماف و ئیمتیازی فەرمانبەران بەگشتی و مامۆستایان بەتایبەتی."
