دوانیوەڕۆی ئەمڕۆ نرخی دۆلار دابەزی و ١٠٠ دۆلار بە ١٥٤ هەزار و ٩٠٠ دینار مامەڵەی پێوەکرا و هەزار و ١٠٠ دینار لە بەهاکەی دابەزی.
ئەمڕۆ پێنجشەممە، بانکی ناوەندی عێراق خشتەی فرۆشتنی دۆلاری بڵاوکردەوە و زیاتر لە ١٩٨ ملیۆن دۆلاری خستە بازاڕەوە کە بڕی ١٦٥ ملیۆن دۆلاری بەشێوەی حەواڵە بووە و زیاتر لە ٣٣ ملیۆن دۆلاریشی بەشێوەی کاش بووە.
بەراورد بە رۆژی رابردوو ئاستی فرۆشی دۆلار ئەمڕۆ بەرزبووەتەوە، رۆژی
رابردوو بانکی ناوەندی زیاتر لە ١٩٧ ملیۆن دۆلاری فرۆشتووە و ئەمرۆ فرۆشی کاش ٤ ملیۆن
دۆلار زیادی کردووە.
ئەمەش دوای ئەوەدێت لە دوای سەردانەکەی محەمەد شیاع سودانی سەرۆک
وەزیرانی عێراق بۆ ئەمریکا و کۆبونەوەی لەگەڵ بەرپرسانی وەزارەتی گەنجینەی ئەمریکا
و گفتوگۆ کردن لەسەر پرسی دۆلار بەهای دۆلار بە نزیکەی هەزار و ٥٠٠ دینار تاوەکو
دوو هەزار دینار دابەزینی بە خۆیەوە بینی.
لە کۆبونەوەی سودانی لەگەڵ بەرپرسانی ئەمریکا برایان نیلسۆن یاریدەدەری وەزیری
گەنجینەی ئەمریکا، ئامادەیی گەنجینەی ئەمەریکای دەربری بۆ کارکردن لە نزیکەوە لەگەڵ
بانکی ناوەندی عێراق و هاوکاریکردنی لە بوارەکانی نەختینەی دارایی و حەواڵەی بانکی
بازرگانی عێراقی بۆ دەرەوەی وڵات.