دانیشتوانی لیبیا لە دوای زریانی دانیاڵەوە توشی گرفتی نەبوونی ئاوی سازگار بوون و لەلایەکی دیکەشەوە مەترسی بڵاوبوونەوەی مین و تەقەمەنی بە هۆی لافاوەوە کە ساڵانی پێشوو لە کاتی شەڕەکان بەجێ مابوون بەرۆکی رزگاربوانی گرتووە.
دوای کەمبونەوەی کاریگەری زریان لە لیبیا ئەو کەسانەی کە هەفتەیەک لەمەوبەر بەهۆی خانووەکانیان وێران بوو ئێستا دەناڵینن بەهۆی نەبوونی ئاوی سازگارەوە و تا ئێستا ٥٥ منداڵ بەهۆی خواردنی ئاوی پیسەوە ژەهراوی بوون.
لە لایەکی دیکەوە، بە پێی
راپۆرتێکی نوسینگەی نەتەوە یەکگرتووەکان بۆ هەماهەنگی کاروباری مرۆیی، ئاوی لافاو
و زریانەکان بوونەتە هۆی گواستنەوەی مین و تەقەمەنی کە بۆهۆی شەڕەوە لە ساڵانی
رابردوودا لە لیبیا چێندراوبوون ئەمەش مەترسی
لەسەر جوڵەی هەزاران کەسی ئاوارە بووی ئەو وڵاتە دروستکردووە.
هاوکات، ترسی ئەوە هەیە هەزاران
کەس گیانیان لەدەستدابێت دوای داڕمانی دوو بەنداو لە شاری دێرنە لە ١٠ی ئەیلولدا کە
بووە هۆی روخانی باڵەخانەکانی نیشتەجێبوون کە لە نزیک روبارێکدا دروستکرابوون بەو
هۆیەوە چاندان تەرم بەرەو دەریای ناوەڕاست رۆشتوون.
شاری دێرنە دانیشتوانەکەی
بە ١٢٠ هەزار کەس مەزندە دەکرێت کەچی لە ئێستادا تەواوی شارەکە بە قوڕ داپۆشراوە و
لانیکەم ٨٩١ باڵەخانە وێران بوون و سەرۆکی لیبیاش رایگەیاند رەنگە ٢٠ هەزار کەس گیانیان
لەدەستدابێت.
هەفتەی رابردوو زریانی بەهێزی
دانیاڵ بە ناوچەکانی رۆژهەڵاتی لیبیادا تێپەڕی و زیانێکی زۆری بە سروشت و دانیشتوانی
هەندێ ناوچەی ئەو وڵاتە گەیاند.
بە پێی راپۆرتێکی نەتەوەیەکگرتووەکان
١١ هەزار و٣٠٠ کەس گیانیان لەدەستداوە و زیاتر
لە ١٠ هەزار کەسیش بێسەروشوێن.